परभणी : नांदेड, परभणी, हिंगोली जिल्ह्यातील शासकीय खरेदी केंद्रांवर किमान आधारभूत किंमत दराने हरभरा खरेदीसाठी उत्पादकतेनुसार प्रतिहेक्टरी १० क्विंटलची मर्यादा निश्चित करण्यात आली आहे. परंतु अनेक ठिकाणी गोदामात साठविण्यासाठी जागा अपुरी असल्यामुळे अजून हरभरा खरेदी सुरू झालेली नाही. त्यामुळे शेतकऱ्यांना खुल्या बाजारात कमी दराने हरभरा विकावा लागत आहे.
नांदेड, परभणी, हिंगोली जिल्ह्यात यंदा हरभऱ्याच्या क्षेत्रात जवळपास दुपटीने वाढ झाली आहे. नवीन हरभऱ्याची आवक बाजारात सुरू झाली आहे. किमान आधारभूत किंमत ४४०० रुपये क्विंटल असताना व्यापारी मात्र १२०० ते १६०० रुपये फरकाने खरेदी करत आहेत. सध्या तूर खरेदी सुरू असलेल्या ठिकाणी हरभऱ्याची खरेदी केली जाणार आहे.
आजवर उत्पादकता आदेश नसल्यामुळे हरभरा खरेदी करता येत नसल्याचे सांगितले जात होते. शासनाने नांदेड, परभणी, हिंगोली जिल्ह्यांसाठी प्रतिहेक्टरी १० क्विंटल हरभरा खरेदीची मर्यादा शासनाने ठरवून दिली आहे. हिंगोली जिल्ह्याची हरभऱ्याची सरासरी उत्पादकता प्रतिहेक्टरी ९.८४ क्विंटल आल्याची माहिती कृषी विभागाने जिल्हा मार्केटिंग अधिकारी कार्यालयास कळवली आहे. परभणी जिल्ह्याच्या उत्पादकतेची माहिती कृषी विभागाकडून अजून उपलब्ध झालेली नाही. पीक कापणी प्रयोगाच्या निष्कर्षानंतर उत्पादकतेत बदल होऊ शकतो.
सध्या प्रतिहेक्टरी १० क्विंटल हरभरा खरेदीचे निर्देश आहेत. परभणी, हिंगोली जिल्ह्यांत सोमवार (ता. २६) पासून हरभरा खरेदी सुरू करण्याचे आदेश दिले असल्याचे सूत्रांनी सांगितले.