अमरावती : राष्ट्रीय अन्नसुरक्षा अभियानांतर्गत अमरावती विभागातील पाच जिल्ह्यांत १८,७२८ क्विंटल अनुदानावरील हरभरा बियाणे महाबीज विक्रेत्यांकडे उपलब्ध करून देण्यात आले आहेत. शेतकऱ्यांनी या बियाण्यांची मागणी करावी, असे आवाहन विभागीय व्यवस्थापक बी. डी. लुले यांनी केले आहे.
महाबीजकडून राष्ट्रीय सुरक्षा अभियानांतर्गत या वर्षी रब्बी हंगामाकरिता हरभरा बियाणे अनुदानावर उपलब्ध करून देण्यात आले आहेत. १५ वर्षांआतील संशोधित बियाण्याचा यात समावेश आहे. जाकी, दिग्विजय या वाणाचे अनुदानित दर ६५०० रुपये प्रतिक्‍विंटल असून, जाकी वाणाची ३० किलोची बॅग १९५० रुपयांना आहे. दिग्विजय हरभरा वाणाची २० किलोची बॅग १३०० रुपयांना आहे. त्याचप्रमाणे काबुली हरभरा विराट या वाणाचे दर ९५०० रुपये प्रतिक्‍विंटल असून, पाच किलोची बॅग ४७५ प्रमाणे परमीटद्वारे धारण क्षेत्रानुसार २ हेक्‍टरच्या मर्यादेत वितरित होईल. याकरिता शेतकऱ्यांनी गावातील कृषी सहायकांशी संपर्क साधण्याचे आवाहन करण्यात आले आहे.
जिल्हानिहाय बियाणे उपलब्धता (क्विंटल) ः अकोला ः ४०५०, अमरावती ः ४८००, वाशीम ः ३७६३, बुलडाणा ः ३७००, यवतमाळ ः २४१५, एकूण ः १८,७२८.
