अकोला ः शेतकऱ्यांचे उत्पन्न दुप्पट करण्यासाठी शासन उन्नत शेती समृद्ध शेतकरी अभियानातून कृषी यांत्रिकीकरणासाठी प्रोत्साहन देत अाहे. मात्र या योजनेतून अनेक महिन्यांपासून अनुदान न मिळाल्याने शेतकरी अडचणीत अाले होते. याबाबत शुक्रवारी (ता. ११) ‘अॅग्रोवन’मध्ये वृत्त प्रसिद्ध होताच जिल्ह्यात सुमारे पावणेतीन कोटींचे अनुदान प्राप्त झाले आहे.
कृषी यांत्रिकिकरण योजनेअंतर्गत या वर्षातील लाभार्थी निवडण्यासाठी नव्याने अर्जप्रक्रिया राबवली जात अाहे. कृषी विभागाने यंत्रांसाठी आॅनलाइन अर्ज दाखल करण्याचे अावाहन केले अाहे. एकीकडे ही प्रक्रिया राबवली जात असताना दुसरीकडे मात्र जुने अनुदान मिळत नव्हते. शेतकरी वारंवार कृषी कार्यालयात जाऊन अनुदानाबाबत सातत्याने विचारणा करीत होते.
उन्नत शेती-समृद्ध शेतकरी अंतर्गत शेतकऱ्यांना रोटाव्हेटर, मळणीयंत्र, ट्रॅक्टर, पॉवर टिलर, पेरणी यंत्र, डाळमील, कपाशी श्रेडर, कल्टीवेटर, पॉवर विडर, पाइल, पंप संच अशा प्रकारचे विविध यंत्र घेण्याची मुभा अाहे. शेतकऱ्यांना त्याच्या गरजेनुसार हवे असलेले यंत्र घेण्यासाठी शासनाकडे अाॅनलाइन अर्ज दाखल करावा लागतो. योजनेतून ट्रॅक्टरसारखे मोठे यंत्र घेतलेल्या शेतकऱ्यांना एक ते सव्वा लाखापर्यंत अनुदान मिळते. तर इतर यंत्रांना त्यांच्या किमती व निकषानुसार अनुदान देय अाहे.
अकोला जिल्ह्यात सुमारे ६०० ट्रॅक्टर व इतर यंत्रे वाटप झालेली अाहेत. यंत्र खरेदी केलेल्या शेतकऱ्यांसाठी पावणेतीन कोटी रुपये अनुदान प्राप्त झाल्याची माहिती सूत्रांनी दिली अाहे. यापैकी अकोला, मूर्तिजापूर, बार्शीटाकळी या तीन तालुक्यांतील शेतकऱ्यांचे थकलेले अनुदान दोन कोटी ३७ हजार रुपये खात्यात जमा झाले. जिल्ह्यात दोन कोटी ७५ लाख रुपये अनुदान मार्चनंतर मिळाल्याची माहिती जिल्हा अधीक्षक कृषी कार्यालयातील सूत्रांनी दिली.
