जळगावात हिरवी मिरची, सोयाबीनचे दर वाढले

जळगाव ः येथील कृषी उत्पन्न बाजार समितीमध्ये मागील आठवड्यात हिरवी मिरची, चवळी व धान्यात सोयाबीनमध्ये तेजीचा कल दिसून आला. सोयाबीनची आवक कमी राहिली. हिरव्या मिरचीसह चवळीची आवकही घटल्याची माहिती मिळाली.  सोयाबीनची प्रतिदिन ४०० क्विंटल आवक झाली. तेवढी आवक झाली. सोयाबीनचे दर २७०० ते ४१०० रुपये प्रतिक्विंटल, असे होते. हिरव्या मिरचीची आवक प्रतिदिन २० क्विंटल होती. तिला १५०० ते ३००० रुपये प्रतिक्विंटल दर होता. चवळीची आवक प्रतिदिन दोन क्विंटल, अशी होती. तिला प्रतिक्विंटल १५०० ते ३२०० रुपये प्रतिक्विंटल दर मिळाला. वाल शेंगेला प्रतिक्विंटल १२०० ते २६०० रुपये प्रतिक्विंटलचा दर राहिला. कांद्यावरील निर्यात मूल्य रद्द केल्याने त्याचा सकारात्मक परिणाम कांदा उत्पादकांसाठी दिसून आला. कांद्याच्या दरात क्विंटलमागे ३५० रुपयांची सुधारणा झाली. त्याचे मागील दोन दिवसांतील दर १५०० ते २८०० रुपये प्रतिक्विंटल, एवढे राहिले. त्याची आवक प्रतिदिन ४२५ क्विंटल राहिली. मूग, उडदाच्या दरातही क्विंटलमागे १५० रुपयांनी सुधारणा झाली. डाळमिलकडून मागणी वाढल्याने उडदाचे व्यापारी ते डाळमिलचालक, असे सौदे झाले. उडदासह मुगाची किरकोळ, अशी आवक बाजार समितीत झाली.  मेथी, कोथिंबीर, गाजर, टोमॅटो यांची आवक कायम राहिली. मेथीला प्रतिक्विंटल ६०० ते १००० रुपये प्रतिक्विंटल दर मिळाला. कोथिंबिरीला प्रतिक्विंटल ४०० ते ११०० रुपये दर होता. मेथीची आवक प्रतिदिन १० क्विंटल, तर कोथिंबिरीची आवक प्रतिदिन आठ क्विंटल, अशी होती. टोमॅटोची आवक प्रतिदिन २० क्विंटल होती. त्याला प्रतिक्विंटल ६०० ते १२०० रुपये दर होता.  कोबीची प्रतिदिन २१ क्विंटल एवढी आवक झाली. तिला प्रतिक्विंटल १२०० ते २२०० रुपये दर होता. पपईची शनिवारी अधिकची आवक झाली. तिला ४०० ते १००० रुपये प्रतिक्विंटल दर होता. पेरू, डाळिंबासह बोरांची आवक कमी झाल्याचे सूत्रांनी सांगितले.