मिरची झाली तोडणीलाही महाग

अकोला : या मोसमात लागवड केलेल्या हिरव्या मिरचीचा हंगाम सुरू झाला असून, सुरवातीलाच दर गडगडलेले असल्याने उत्पादकांना तोडणीचा खर्चही महाग झाल्याची स्थिती अाहे. हिरवी मिरची ठोकमध्ये अवघी ५ ते ६ रुपये किलो दराने व्यापारी मागत अाहेत. मागील २० दिवसांपासून हे दर असल्याचे शेतकरी सांगत अाहेत. पावसाळ्यात हिरव्या मिरचीची रोपे लावणी करून अाॅगस्ट-सप्टेंबरमध्ये यातील माल निघणे सुरू होत असतो. सध्या मिरचीची काढणी सुरू झाली अाहे. मात्र गेल्या हंगामाच्या तुलनेत दर खूपच कमी मिळत अाहेत. दरांमध्ये जवळपास दुप्पट-तिप्पट तफावत अाहे. पावसाळ्यात हिरवी मिरची लागवड करून अनेक शेतकरी चांगले उत्पन्न काढतात. मिरचीला असलेली मागणी पाहता दरही बऱ्यापैकी मिळत असतात. या वर्षी इतर पिकांप्रमाणेच मिरचीच्या दरातही घसरण झाली अाहे. अवघा पाच ते सहा रुपये किलोचा दर शेतकऱ्यांना कुठल्याच परिस्थिती परवडणारा नाही. तोडणीसाठी मजुरीचा दरसुद्धा अधिक अाहे. सध्या तापमान वाढलेले असून, या परिस्थितीत पाण्याची गरज वाढली अाहे. मात्र विजेची समस्यासुद्धा शेतकऱ्यांना अधिक त्रस्त करीत अाहे. तासनतास वीजपुरवठा बंद राहत अाहे. अशाही स्थितीत शेतकरी नेमकेच सुरू झालेले हे मिरचीचे पीक वाचवण्यासाठी मेहनत घेत अाहेत. मात्र अातापर्यंत खर्च अधिक व उत्पन्न कमी अशी परिस्थिती बनलेली अाहे.