सोलापुरात हिरवी मिरची, गवार, भेंडी तेजीतच

सोलापूर ः सोलापूर कृषी उत्पन्न बाजार समितीच्या आवारात गतसप्ताहात हिरवी मिरची, गवार, भेंडीला मागणी चांगली राहिली. त्यांची आवकही स्थिर होती. पण त्यांचे दर या सप्ताहातही पुन्हा तेजीतच राहिल्याचे बाजार समितीच्या सूत्रांकडून सांगण्यात आले. बाजार समितीच्या आवारात गतसप्ताहात हिरवी मिरचीची रोज ३० क्विंटल, गवारची २० क्विंटल आणि भेंडीची १५ क्विंटल आवक राहिली. या सर्व भाज्यांची आवक उत्तर सोलापूर, दक्षिण सोलापूर, मोहोळ, बार्शी या स्थानिक भागातूनच झाली. गेल्या दीड-दोन महिन्यांपासून त्यांच्या दरात आणि आवकेत सातत्याने चढ-उतार होताना, तेजीचे वातावरण आहे, या सप्ताहातही ते जैसे थेच राहिले. त्यात मागणी असल्याने तेजी वरचेवर वाढतच राहिली. हिरव्या मिरचीला प्रतिदहा किलोसाठी २०० ते ४०० रुपये, गवारला २५० ते ३५० रुपये आणि भेंडीला २०० ते ३०० रुपये असा दर मिळाला. त्याशिवाय वांगी, बटाटा, ढोबळी मिरची यांचे दर काहीसे स्थिर राहिले. बटाट्याला प्रतिदहा किलोसाठी १०० ते १५० रुपये, ढोबळी मिरचीला १२० ते १८० रुपये असा दर मिळाला. वांगी, टोमॅटोच्या दरात मात्र अद्यापही सुधारणा झालेली नाही. त्यांचे दरही काहीसे स्थिर राहिले. वांग्याला प्रतिदहा किलोसाठी ७० ते १२० रुपये आणि टोमॅटोला ३० ते ६० रुपये असा दर मिळाला. भाजीपाल्याच्या दरात मात्र या सप्ताहात काहीशी सुधारणा झाली. भाज्यांची आवक प्रत्येकी १० हजार पेंढ्यांपर्यंत झाली. भाज्यांची आवक ही स्थानिक भागातूनच सर्वाधिक झाली. कोथिंबिरीला शंभर पेंढ्यासाठी २५० ते ४०० रुपये, शेपूला ३०० ते ३५० रुपये आणि मेथीला २०० ते ४५० रुपये असा दर मिळाला.  कांद्याचे दर स्थिर कांद्याच्या आवकेत या सप्ताहात काहीशी घट झाली. पण दरात मात्र फारशी सुधारणा झाली नाही, कांद्याची आवक प्रत्येकी ७० ते ८० गाड्या आवक झाली.गेल्या दोन आठवड्यांपासून कांद्याचे दर काहीसे स्थिरच आहेत. या सप्ताहातही ते तसेच राहिले. कांद्याला प्रतिक्विंटल २०० ते ८०० व सरासरी ४०० रुपये असा दर मिळाल्याचे बाजार समितीच्या सूत्रांकडून सांगण्यात आले.