सोलापुरात हिरवी मिरची, गवार, वांग्याचे दर वधारले

सोलापूर ः सोलापूर कृषी उत्पन्न बाजार समितीच्या आवारात गतसप्ताहात हिरवी मिरची, गवार, वांग्याला मागणी राहिली. त्यांचे दरही वधारल्याचे बाजार समितीच्या सूत्रांनी सांगितले. गतसप्ताहात बाजार समितीच्या आवारात गवारची रोज १० ते १५ क्विंटल, वांग्याची ३५ ते ४० क्विंटल आणि हिरव्या मिरचीची ८० क्विंटल आवक राहिली,  ही सगळी आवक  स्थानिक भागातूनच झाली. पण मागणी चांगली असल्याने त्याला उठावही मिळाला. गवारला प्रतिदहा किलोसाठी १७० ते ४२५ व सरासरी २५० रुपये दर राहिला. वांग्याला १०० ते ४०० व सरासरी २०० रुपये आणि हिरव्या मिरचीला ८० ते ३०० व सरासरी १५० रुपये असा दर मिळाला. गेल्या दोन महिन्यांपासून गवार, वांगी, हिरवी मिरचीच्या दरात सातत्याने चढ-उतार होत राहिले. पण या सप्ताहात त्यांच्या दरात आणि मागणीत काहीशी वाढ झाली. घेवड्यालाही या सप्ताहात चांगलाच उठाव मिळाला. घेवड्याची आवक रोज किमान ५ ते ७ क्विंटल राहिली. घेवड्याला प्रतिदहा किलोसाठी २५० ते ४०० व सरासरी ३५० रुपये असा दर राहिला. भाज्यांच्या दरातील तेजी या सप्ताहातही टिकून होती. विशेषतः कोथिंबिरीचे दर चांगलेच तेजीत होते. कोथिंबिरीला शंभर पेंढ्यांसाठी १००० ते १८०० रुपये, मेथीला १००० ते १२०० रुपये आणि शेपूला ६०० ते ८०० रुपये असा दर मिळाला.  कांद्याच्या दरात सुधारणा कांद्याच्या दरात या सप्ताहात चांगलीच सुधारणा झाली. कांद्याची आवक मुख्यतः स्थानिक भागातून झाली. बाहेरील आवक तुलनेने कमी राहिली. रोज सरासरी ४० ते ६० गाड्या इतकी आवक  झाली. पण कांद्याला मागणी राहिल्याने दरात सुधारणा झाली. कांद्याला प्रतिक्विंटल २०० ते २७०० व सरासरी १२०० रुपये असा दर मिळाला.