मूग, उडीद पीककापणीची माहिती २८ पर्यंत कळवावी ः कृषिमंत्री

सदोष बियाण्यांमुळे ज्या शेतकऱ्यांना नुकसान सहन करावे लागले त्यांना नुकसानभरपाई देण्याचे आदेश संबंधित बियाणे कंपन्यांना देण्यात आले आहेत. - सदाभाऊ खोत, कृषी राज्यमंत्री
पांडुरंग फुंडकर
पांडुरंग फुंडकर

मुंबई : राज्यातील सर्व जिल्ह्यांतील मूग आणि उडदाच्या पीककापणीची आकडेवारी २८ सप्टेंबरपर्यंत कृषी विभागाला कळविण्यात यावी, असे निर्देश कृषिमंत्री पांडुरंग फुंडकर यांनी रविवारी (ता. २४) दिले.

सह्याद्री अतिथीगृहावर कृषिमंत्र्यांच्या अध्यक्षतेखाली राज्यस्तरीय कृषी आढावा बैठक झाली. त्या वेळी ते बोलत होते. बैठकीला कृषी राज्यमंत्री सदाभाऊ खोत, कृषी विभागाचे प्रधान सचिव विजय कुमार, कृषी आयुक्त सचिंद्र प्रताप सिंह यांच्यासह अधिकारी उपस्थित होते.

कृषिमंत्री म्हणाले, की या वेळी मूग आणि उडदाच्या पीककापणीची आकडेवारी २८ सप्टेंबरपर्यंत कृषी विभागाला कळविण्यात यावी, असे निर्देश राज्यातील सर्व जिल्ह्यांना देण्यात येत आहेत. त्यामुळे ऑक्टोबरच्या पहिल्या आठवड्यापासून पीकविमा प्रक्रियेला सुरवात करण्यात येईल आणि ऑक्टोबरअखेरपर्यंत शेतकऱ्याला पीकविम्याची रक्कम त्यांच्या बँक खात्यात मिळावी या दृष्टीने प्रयत्न करण्यात येत आहेत.

कापसाच्या पिकाचेदेखील नियोजन करण्यात येत आहे. त्यासाठी सीसीआयने परवानगी दिली तर त्यांच्या परवानगीसह अन्यथा त्यांच्या परवानगीशिवाय कापसाच्या खरेदीसाठी राज्य शासनामार्फत कापूस खरेदी केंद्र उभारण्यात येईल. खरीप हंगामाअखेर सोयाबीनच्या पिकाचे जे नुकसान झाले आहे, त्याच्या पाहणीकरिता संबंधित क्षेत्रातील कृषी अधिकाऱ्यांनी त्वरित पीकक्षेत्राला भेटी द्याव्यात व झालेल्या नुकसानाचा पंचनामा करून अहवाल विभागाला सादर करावा, असे निर्देशही कृषिमंत्र्यांनी या वेळी दिले.

तसेच १७ पदे पदोन्नतीने भरण्यास पदोन्नती समितीच्या बैठकीत मान्यता देण्यात आली असून, प्रस्ताव शासनास सादर करण्यात आला असल्याची माहिती कृषिमंत्र्यांनी दिली. येत्या रब्बी हंगामात शेतकऱ्यांना १ लाख ७० हजार कोटी क्विंटल हरभरा बियाण्यांचे वितरण कृषी विभागामार्फत करण्यात येणार आहे. गतवर्षी १ लाख ३७ हजार बियाण्यांचे वितरण करण्यात आले होते.

शेतकऱ्यांच्या हाती अधिकाधिक प्रमाणात देशी बियाणे देण्यावर शासनाचा भर असणार आहे. नाशिकमध्ये कृषी सहायक ग्रामपंचायतीमध्ये जाऊन शेतकऱ्यांचे प्रश्न जाणून घेतात. हा प्रयोग राज्यभर राबविण्याचा विचार राज्य शासन करत असून, त्यासाठी परिपत्रक काढले जाणार असल्याची माहितीदेखील कृषिमंत्र्यांनी या वेळी दिली.  

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com