पालकमंत्री डॉ. रणजीत पाटील जेव्हा वखरणी करतात

अकोला  ः शेतकऱ्यांचा उत्साह, मनोबल वाढविण्यासाठी शनिवारी (ता. ३०) जिल्ह्यात एक दिवस शेतकऱ्यांसोबत हा उपक्रम राबवण्यात अाला. जिल्ह्याचे पालकमंत्री डॉ. रणजित पाटील यांनी अधिकाऱ्यांसह अकोला तालुक्यात ठिकठिकाणी भेटी देत शेतकऱ्यांच्या अडणची जाणून घेतल्या. या वेळी सर्व यंत्रणांचे अधिकारी त्यांच्यासोबत सहभागी झाले होते. दौऱ्यात डोंगरगाव येथे डॉ. पाटील यांनी पेरणी सुरू असलेल्या शेतात भेट देत वखरणीसुध्दा केली.   

पालकमंत्री डॉ. रणजित पाटील यांनी दौऱ्याची सुरवात डॉ. पंजाबराव देशमुख कृषी विद्यापीठाच्या प्रक्षेत्रावरील शेततळ्यांच्या पाहणीपासून केली. या वेळी जिल्हाधिकारी अास्तिककुमार पांडेय, कुलगुरू डॉ. व्ही. एम. भाले यांच्यासह इतर अधिकारी उपस्थित होते.

दरम्यान, शेतकऱ्यांसोबत संवाद साधत त्यांच्या समस्या, अडचणी जाणून घेण्यासाठी, तसेच  शेतीविषयक माहिती देण्याकरिता शेतकऱ्यांच्या बांधावर जाण्याचा उपक्रम अकोला जिल्हा प्रशासनाने अायोजित केला होता. जिल्हाधिकारी आस्तिककुमार पांडेय यांच्या संकल्पनेनुसार जिल्हाभर याची अंमलबजावणी करण्यात अाली.

प्रत्येक तालुकास्तरावर तहसीलदार, गटविकास अधिकारी व तालुका कृषी अधिकारी यांनी समन्वय साधून तालुक्यामध्ये एक दिवस शेतकऱ्यांसोबत हा उपक्रम राबविण्याचे नियोजन करण्यात अाले आहे. तालुक्यातील सर्व गावांमध्ये गावस्तरीय कर्मचारी व अधिकारी यांनी त्यांच्या गावातील किमान दहा शेतकऱ्यांच्या बांध्यावर जावून शेतकऱ्यांसोबत चर्चा करावी असे नियोजन करण्यात अाले होते. शिवाय, गावपातळीवर नियुक्त केलेल्या अधिकारी- कर्मचाऱ्यांना शेतकऱ्यांची माहिती भरुन घेण्यासाठी एक अर्जसुद्धा देण्यात अाला होता.