भ्रष्टाचारी नसल्यानेच पालकमंत्री आमच्यासोबत : हसापुरे

सोलापूर : लोकमंगल ॲग्रो, बेकायदेशीर बंगला यासह अनेक प्रकरणे ताजी असताना दुसऱ्यांवर भ्रष्टाचाराचे आरोप करणे चुकीचे आहे. सत्तेचा गैरवापर करून विरोधकांना अडकविण्याचा डाव सहकारमंत्री सुभाष देशमुख करत आहेत. आम्ही जर भ्रष्टाचारी असतो तर स्वच्छ प्रतिमेचे आणि कोणत्याही वादात नसलेले पालकमंत्री विजयकुमार देशमुख आमच्यासोबत आले असते का? असा सवाल जिल्हा बॅंक संचालक सुरेश हसापुरे व नगरसेवक गणेश वानकर यांनी पत्रकारांशी बोलताना उपस्थित केला.

हत्तूर येथील प्रचार सभेत सहकारमंत्री सुभाष देशमुख यांच्यासह अन्य वक्‍त्यांनी केलेल्या आरोपांचा समाचार हसापुरे व वानकर यांनी घेतला.

हसापुरे म्हणाले, की बाजार समितीच्या कारभाराची चौकशी व्हावी, अशा मागणीचे पत्र मी व शिवदारे यांनी तत्कालीन पणनमंत्री चंद्रकांतदादा पाटील यांना दिले होते. त्यांनी या पत्रानुसार चौकशी केली. या तक्रारीत तथ्य नसल्याचे पत्र तत्कालीन लेखापरीक्षकांनी दिले आहे. सहकार व पणन खाते देशमुख यांच्याकडे आल्यानंतर त्यांनी फेरचौकशी केली. सत्तेचा वापर करून फेर चौकशी करून निवडणुकीच्या तोंडावर हे षडयंत्र आखले आहे.