मध्य महाराष्ट्रात उष्णतेच्या लाटेचा इशारा

पुणे : विदर्भासह राज्यात अनेक ठिकाणी तापमान ४३ अंशांच्या पुढे गेले आहे. शनिवारी सकाळपर्यंतच्या २४ तासांमध्ये चंद्रपूर येथे राज्यातील उच्चांकी ४५.६ अंश सेल्सिअस तापमानाची नोंद झाली आहे. पुढील काही दिवस तापमानाचा पारा चढाच राहणार असून, विदर्भात मंगळवारपर्यंत (ता. १) तर मध्य महाराष्ट्रात रविवारपर्यंत (ता. २९) उष्णतेच्या लाटेचा इशारा हवामान विभागाने दिला आहे. महाराष्ट्र, मध्य प्रदेश, राजस्थानमध्ये तापमानाच्या पाऱ्याचे चांगलीच उसळी घेतली आहे. शनिवारी सकाळपर्यंत राजस्थानमधील चुरू येथे देशभरातील उच्चांकी ४६.५ अंश सेल्सिअस तापमानाची नोंद झाल्याचे हवामान विभागाने स्पष्ट केले आहे. मध्य महाराष्ट्रातील नगर, जळगाव, मालेगाव, मराठवाड्यातील परभणी, नांदेड, विदर्भातील अकोला, चंद्रपूर, नागपूर, वर्धा, यवतमाळ या ठिकाणी तापमान ४३ अंशांच्या पुढे गेले आहे. राज्यात काही ठिकाणी तापमान यापेक्षाही अधिक असण्याची शक्यता आहे.  राज्यात सर्वत्र सरासरीपेक्षा अधिक तापमानाची नोंद होत आहे. मध्य महाराष्ट्रात तापमानात सरासरीपेक्षा २ ते ४ अंश, मराठवाड्यात १ ते २ अंश आणि विदर्भात २ ते ३ अंशांची वाढ झाल्याचे हवामान विभागाने स्पष्ट केले आहे. सकाळपासून वाढलेल्या उन्हामुळे बाहेर पडणेही त्रासदायक ठरत आहे. दुपारच्या वेळी उन्हाचा चटका अधिक वाढत आहे. वापरासाठी साठवून ठेवलेले पाणी गरम होत असल्याचे दिसून येत आहे. धरणांसह लहान मोठ्या जलसाठ्यातील पाण्याचा बाष्पीभवनाचा वेगही वाढला असल्याने पाणीसाठा झपाट्याने कमी होणार आहे.   शनिवारी (ता. २८) सकाळपर्यंतच्या २४ तासांमध्ये राज्यातील विविध ठिकाणचे कमाल तापमान (अंश सेल्सिअसमध्ये) : पुणे ४०.२, नगर ४३.९, जळगाव ४३.५, कोल्हापूर ३९.६, महाबळेश्वर ३४.६, मालेगाव ४४.८, नाशिक ४०.५, सांगली ४०.८, सातारा ४०.१, सोलापूर ४१.४, मुंबई (सांतक्रूझ) ३३.०, अलिबाग ३१.४, रत्नागिरी ३३.०, डहाणू ३२.०, औरंगाबाद ४०.४, परभणी ४३.२, नांदेड ४३.३, अकोला ४४.२, अमरावती ४२.६, बुलडाणा ४१.५, चंद्रपूर ४५.६, गोंदिया ४२.२, नागपूर ४४.१, वर्धा ४४.२, यवतमाळ ४३.५.