राज्यात उन्हाच्या झळा वाढल्या

पुणे : दोन दिवस घटलेल्या तापमानात पुन्हा वाढ झाल्याने राज्यात उन्हाच्या झळा वाढल्या आहेत. विदर्भात अनेक ठिकाणी तापमान ४४ अंशांच्या वर जात उष्णतेची लाट आली आहे. चंद्रपूर येथे तापमान यंदाच्या हंगामात उच्चांकी ४७.५ अंशांवर पोचले आहे. कोकण व मध्य महाराष्ट्रात शनिवारी वादळी पावसाची शक्यता आहे. तर रविवारपासून (ता. २०) राज्यात कोरड्या मुख्यत: कोरड्या हवामानाचा अंदाज वर्तविण्यात आला आहे.      राज्यात पूर्वमोसमी पावसाला पोषक हवामान असल्याने दोन दिवसांपासून ढगाळ वातावरण होते. यामुळे तापमानात काहीशी घट झाली होती. शुक्रवारी (ता. १८) सकाळपर्यंतच्या २४ तासांमध्ये कोकण वगळता राज्यात बहुतांश ठिकाणी तापमानाचा पारा ४० अंशांच्या वर सरकला होते. नगर, जळगाव, मालेगाव, परभणी, नांदेड, अकोला, ब्रह्मपुरी, अमरावती, नागपूर, वर्धा, यवतमाळ येथे तापमान ४३ अंशांच्या पुढे गेले आहे. चंद्रपूर येथे ११ मे रोजी यंदाच्या हंगामातील उच्चांकी ४७.३ अंश सेल्सिअस तापमानाची नोंद झाली होती. शुक्रवारी सकाळपर्यंतच्या २४ तासांमध्ये चंद्रपूर येथे पारा ४७.५ अंशावर पोचला होता.      अरबी समुद्रात आलेले ‘सागर’ चक्रीवादळ अदेन (येमेन) च्या खाडीमध्ये घोंगावत होते. ताशी १८ किलोमीटर वेगाने पश्‍चिमेकडे सरकणारे वादळ रविवारी दुपारपर्यंत सोमालीयाच्या किनाऱ्याला धडकण्याचा इशारा देण्यात आला आहे. जमिनीवर येताच या वादळाची तीव्रता कमी होणार आहे. तर अग्नेय अरबी समुद्रात समुद्र सपाटीपासून ९०० मीटर उंचीवर चक्राकार वाऱ्यांची स्थिती निर्माण झाली होती. कर्नाटक आणि केरळदरम्यान वाऱ्यांचे प्रवाह खंडित झाले होते. रविवारपासून हवामान मुख्यत: कोरडे राहणार असून, उन्हाचा चटका वाढणार आहे. तर विदर्भात शनिवारी उष्णतेच्या लाटेची शक्यता आहे. दरम्यान गुरवारी (ता. १७) सायंकाळनंतर सोलापूर, सातारा, सांगली, कोल्हापूर आणि रत्नागिरी जिल्ह्यात अनेक ठिकाणी वादळी वाऱ्यांसह पूर्वमोसमी पावसाने हजेरी लावली. पुण्यातही मेघगर्जना, विजांसह हलक्या पावसाने शिडकावा केला. वादळामुळे झाडपडीच्या घटना घडल्या. शुक्रवारी (ता. १८) दुपारनंतर रत्नागिरी, कोल्हापूरमध्ये ढग गोळा झाले होते. तर मध्य महाराष्ट्र, मराठवाड्यातही अंशत: ढगाळ हवामान होते.