जळगाव जिह्याच्या पश्‍चिम भागात बऱ्यापैकी पाऊस

जळगाव : जिल्ह्यात शुक्रवारी (ता. २२) दुपारी जोरदार पावसाने अनेक भागांत हजेरी लावली. चाळीसगाव, पाचोरा, भडगाव या पश्‍चिम भागात गिरणा काठावरील गावांमध्ये बऱ्यापैकी पाऊस झाला. यामुळे धूळपेरणी केलेल्या बिया अंकुरण्यास अनुकूल वातावरण तयार झाले आहे.  

दुपारी सुमारे ३ वाजेच्या सुमारास सर्वत्र पाऊस सुरू झाला. चोपडा, धरणगाव भागात मध्यम स्वरूपाचा पाऊस झाला. यावल, रावेर, भुसावळ, मुक्ताईनगरातही सरी कोसळल्या. तर जळगाव, पाचोरा, भडगाव व चाळीसगाव भागात दमदार पाऊस झाला. सुमारे तासभर पाऊस झाला. 

चोपडा, रावेर व यावल भागातील नदी, नाल्यांना मात्र अजून पूर आलेला नाही. मध्य प्रदेशात उगम क्षेत्र असलेली रावेर तालुक्‍यातील सुकी नदी खळाळून वाहू लागली आहे. कारण मध्य प्रदेशात या आठवड्यात चांगला पाऊस झाला आहे. पावसामुळे कुठेही मोठे नुकसान झाल्याचे वृत्त नाही. चोपडा तालुक्‍यात सुमारे १८ मिलिमीटर, यावलमध्ये २० मिलिमीटर, जळगावात २२ मिलिमीटर, चाळीसगावात ३४ मिलिमीटर, पाचोरा येथे २५ मिलिमीटर, भडगावात १८ मिलिमीटर, रावेरात १७ मिलिमीटर पाऊस झाल्याची माहिती मिळाली.

जामनेर, बोदवड, भुसावळ व मुक्ताईनगरातही हलक्‍या व मध्यम स्वरुपाचा पाऊस ठिकठिकाणी झाल्याचे सांगण्यात आले. भुसावळ व बोदवडमध्ये मात्र पेरणीलायक पाऊस झालेला नाही. चाळीसगाव भागातही सुमारे दीड तास दमदार बरसला. यामुळे शेतीकामे बंद करावी लागली. यावलमध्येही मजुरांना वाफसा नसल्याने काम सोडून घरी परतावे लागले. जिल्ह्यात आतापर्यंत सर्वाधिक पाऊस चाळीसगाव तालुक्‍यात झाला असून, सुमारे ५० मिलिमीटर एकूण पाऊस आहे. 

धुळे, नंदुरबारातही हजेरी धुळे व नंदुरबार भागातही पावसाने हजेरी लावली. धुळे जिल्ह्यातील शिंदखेडा, शिरपूर, धुळे व साक्री येथे हलका व मध्यम स्वरूपाचा पाऊस झाला. नंदुरबारातही तळोदा, शहादा भागात मध्यम स्वरूपाचा पाऊस झाला. नंदुरबारात सातपुडा पर्वतालगत मात्र दमदार पावसाची प्रतीक्षा कायम आहे.