सांगली जिल्ह्याच्या वादळी वाऱ्यासह जोरदार पाऊस

सांगली ः जिल्ह्यात रविवारी (ता. ३) रात्री दमदार पावसाने हजेरी लावली. कडेगावसह तालुक्‍यात वांगी व अन्य भागांत तसेच तासगाव तालुक्‍यातील सावळजमध्ये जोरदार पाऊस झाला. वांगी (ता. कडेगाव) येथे वादळी वाऱ्यामुळे केळीची बाग जमीनदोस्त झाली आहे. हा पाऊस खरीप हंगामासाठी उपयुक्त ठरणार आहे.

जिल्ह्यात सर्वदूर पाऊस झाल्याने शेतकऱ्यांनाही दिलासा मिळाला. शेतकऱ्यांनी नांगरट, खुरटणी, सरी सोडणे आदी मशागतींला वेग येणार आहे. तासगाव पूर्व भागात वादळी वाऱ्यासह विजांच्या कडकडाटसह तासभर मुसळधार पाऊस झाला. सर्वत्र पाणीच पाणी झाले होते. ताली, बांध तुडूंब भरले. वनविभाग व माळरानावर सी. सी. टी अंतर्गतच्या कामातून खोदलेल्या चऱ्या, लहान ओढे, बंधारे, तुडूंब भरून वाहत होत्या.

खानापूर-विटा तालुक्‍यात सर्वाधिक पाऊस झाला आहे. या तालुक्‍यात ५१.४ मिलीमीटर इतक्‍या पावसाची नोंद झाली आहे. शिराळा तालुक्‍यात पाऊस झाल्याने आगाप धूळवाफेवर भाताची पेरणी झालेल्या पिकास उपयुक्त ठरणार आहे. शेतकरी पावसाची खरीप हंगामातील मशागती आणि पेरणीसाठी प्रतीक्षा करत होता. अाता खरीप हंगामातील मशागतीला वेग वाढणार आहे.

परिसरात चांगला पाऊस झाला आहे. खरीप हंगामातील पेरणीसाठी मशागतीला गती मिळेल. पावसाने खरीप हाती लागण्याची आशा वाढली. द्राक्षबागांनाही फायदा होईल. - मोहन टेके, आरवडे, ता. तासगाव, जि. सांगली.