कोकणात मुसळधार पावसाचा अंदाज

पुणे : अरबी समुद्रात घोंघावत असलेल्या चक्रीवादळाच्या प्रभावाने आजपासून (ता. ११) दक्षिण कोकणात मुसळधार पावसाची शक्यता आहे. तर मध्य महाराष्ट्र, मराठवाड्यात अनेक ठिकाणी आणि विदर्भात तुरळक ठिकाणी पूर्वमोसमी पावसाचा अंदाज वर्तविण्यात आला आहे. सोमवारी (ता. १०) दुपारी औरंगाबाद आणि नगर जिल्ह्यात वादळी वारे, मेघगर्जनेसह पावसाला सुरवात झाली होती. आज (ता. ११) कोकणातील रत्नागिरी, सिंधुदुर्ग, रायगड जिल्ह्यात मुसळधार पावसाचा इशारा देण्यात आला आहे. तर पालघर, ठाण्यासह मुंबईतही पावसाचा अंदाज आहे. मध्य महाराष्ट्रातील नाशिक, नगर, पुणे, कोल्हापूर, सातारा, सांगली, सोलापूर आणि मराठवाड्यातील परभणी, बीड, हिंगोली, नांदेड, लातूर, उस्मानाबाद जिल्ह्यात आणि विदर्भातही तुळक ठिकाणी वादळी पावसाची शक्यता असल्याचे हवामान विभागाने स्पष्ट केले आहे.  पावसामुळे राज्याच्या तापमानातही चढ-उतार सुरू असून, विदर्भात तुरळक ठिकाणी उष्ण लाट येण्याची शक्यता वर्तविण्यात आली आहे.  सोमवारी (ता. १०) सकाळपर्यंतच्या २४ तासांमध्ये चंद्रपूर येथे ४४.८ अंश सेल्सिअस तापमानाची नोंद झाली. तर नागपूर, वर्धा आणि जळगाव येथे तापमान ४४ अंशांच्या पुढे आहे. उर्वरित राज्यात तापमानात थोडीची घट झाली आहे. विदर्भात कमाल तापमान ४० ते ४५ अंश, मराठवाड्यात ४० ते ४१ अंश, मध्य महाराष्ट्रात २७ ते ४४ अंश आणि कोकणात ३३ ते ३७ अंशांच्या दरम्यान आहे.  सोमवारी (ता. १०) सकाळी साडेआठ वाजेपर्यंतच्या २४ तासांत राज्यातील विविध ठिकाणचे कमाल तापमान, कंसात सरासरीच्या तुलनेत वाढ, घट (अंश सेल्सिअसमध्ये) : पुणे ३७.७ (४.०), जळगाव ४४.० (३.६), कोल्हापूर ३५.६(३.८), महाबळेश्वर २७.५ (१.९), मालेगाव ४३.२ (५.९), नाशिक ३७.८ (२.३), सांगली ३६.० (२.५), सातारा ३५.२ (३.०), सोलापूर ३८.५ (१.७), अलिबाग ३६.८ (४.३), डहाणू ३६.० (१.७), सांताक्रूझ ३६.८ (४.३), रत्नागिरी ३३.२ (१.६), औरंगाबाद ४०.० (३.२), परभणी ४०.६ (१.३), नांदेड ४१.५ (२.३), अकोला ४०.३ (०.३), अमरावती ४२.८ (३.५), बुलडाणा ४१.४ (५.२), चंद्रपूर ४४.८ (३.७), गोंदिया ४३.०(२.४), नागपूर ४४.६ (३.७), वर्धा ४४.५ (४.२), यवतमाळ ४२.०(२.६).