पुणे जिल्ह्यातील मावळ पट्ट्यात जोरदार पाऊस

पुणे : सह्याद्रीच्या पूर्व उतारावर असलेल्या मावळ पट्ट्यामध्ये पावसाने जोर धरला आहे. उर्वरीत भागातही हलका ते मध्यम   स्वरुपाचा पाऊस पडत आहे. मुळशी तालुक्यातील माले येथे सर्वाधिक ९३ तर मावळ तालुक्यातील लोणावळा येथे ९० मिलिमीटर पावसाची नोंद झाली आहे. या भागात भात रोपे वाढीच्या अवस्थेत असून, पावसामुळे चिखलणीच्या कामांना वेग येणार आहे. इतर भागात खरिपातील सोयाबीन, भुईमूग, बाजरी, मका आदी पिकांच्या पेरण्या सुरू होणार आहेत.

मंगळवारी (ता.२६) सकाळपर्यंतच्या २४ तासांमध्ये जुन्नर, आंबेगाव, खेड, मावळ, मुळशी, भोर, वेल्हा तालुक्यांच्या पश्‍चिमेकडील भागांमध्ये पावसाचा जोर अधिक होता. सोमवारी रात्री पाऊस वाढला होता. पश्‍चिम भागातील पावसाचा जोर पूर्वेकडे कमी होत गेला. शिरूर, बारामती, पुरंदर, इंदापूर, हवेली तालुक्यात पावसाचे प्रमाण कमी होते. मंगळवारी सकाळपासून ऊन सावल्यांच्या खेळाबरोबरच पावसाच्या सरीवर सरी येत होत्या.

जिल्ह्यात मंगळवारी सकाळपर्यंतच्या २४ तासांमध्ये पडलेला पाऊस (मिलिमीटरमध्ये - स्रोत कृषी विभाग) : माले ९३, मुठे ६०, पिरंगुट ७९, भोलावडे ७२, संगमनेर ३१, निगुडघर ६२, काले ६१, कार्ला ७२, खडकाळा ४८, लोणावळा ९१, वेल्हा ५८, पानशेत ६६, विंझर ४१, अंभवणे ३१, राजूर ३४, डिंगोरे ४६, कुडे ४५, पाईट ३०, आंबेगाव ५१.

जिल्ह्यातील धरण क्षेत्रांमध्ये जोरदार पावसाने हजेरी लावली आहे. पाणलोट क्षेत्रामध्ये पावसाचा जोर वाढल्याने धरणांमध्ये पाणी जमा होण्यास सुरवात झाली आहे. मंगळवारी सकाळपर्यंतच्या २४ तासांमध्ये टेमघर येथे उच्चांकी ११० मिमी पावसाची नोंद झाली आहे. उजनी विसापूर वगळता सर्वच धरणक्षेत्रांमध्ये हलक्या ते जोरदार स्वरुपाच्या पावसाची नोंद झाली.

जिल्ह्यातील धरणांमध्ये पडलेला पाऊस (मिलिमीटरमध्ये) : टेमघर ११०, वरसगाव ७३, पानशेत ६६, खडकवासला १७, पवना ६१, कासारसाई १३, मुळशी ९३, कलमोडी ४५, चासकमान ८, भामा असखेड २९, आंद्रा २५, वडीवळे ६७, गुंजवणी ५९, भाटघर १४, निरा देवघर ६२, वीर ३, नाझरे ४, पिंपळगाव जोगे ३९, माणिकडोह ३०, येडगाव १६, वडज १५, डिंभे ५४, घोड ५.