साताऱ्यात सलग तिसऱ्या दिवशी दमदार पाऊस

सातारा ः जिल्ह्यात सलग तिसऱ्या दिवशी पावसाने झोडपले आहे. वादळी वाऱ्यासह पाऊस येत असल्याने यामुळे खरिपातील सोयाबीन, ज्वारी, बाजरी आदी पिकांचे नुकसान सुरू झाले आहे. जिल्ह्यात गुरुवारी (ता. ४) सकाळी आठपर्यंत सरासरी २२.९८ मिलिमीटर पावसाची नोंद झाली आहे.

जिल्ह्यात बहुतांशी भागात रविवारपासून पावसाने जोरदार आगमन केले आहे. सोमवारी जिल्ह्याच्या अनेक भागांत वादळी वाऱ्यासह जोरदार पाऊस झाला आहे. काही ठिकाणी दोन ते तीन तास सलग पाऊस झाला. अनेक वृक्ष उन्मळून पडले आहेत. तसेच अनेक शेतात पाणी साचल्याने पिके कुजण्याची भीती निर्माण झाली आहे. मंगळवारी पावसाचा जोर कायम राहिला आहे. ओढ्यासह नदीच्या पाणीपातळीत वाढ झाली आहे. पावसामुळे शेतातील सर्व कामे ठप्प झाली आहेत.

काढणीला आलेल्या पिके भिजत असल्याने शेतकऱ्यांना काळजी वाढली आहे. वादळी वाऱ्यामुळे उसाचे पीक मोठ्या प्रमाणात आडवे झाले आहे. ऊस तुटण्यास उशीर झाल्यास उंदिराचा उपद्रव वाढणार आहे. मंगळवारी पश्चिम भागासह दुष्काळी तालुक्यातही अनेक भागांत पाऊस झाला आहे. काढणीला आलेल्या खरीप पिकांसाठी हा पाऊस नुकासानकारक असलातरी रब्बी हंगामासाठी हा पाऊस फायदेशीर ठरणार आहे.  

किकली परिसरात गारांसह पाऊस सोमवारी वाई तालुक्यात किकली परिसरात सोमवारी गारांसह जोरदार पाऊस झाला आहे. या गारामुळे हळद पिकांची पाने फाटून मोठे नुकसान झाले आहे. यामुळे परिसरातील शेतकऱ्यांकडून भरपाईची मागणी केली जात आहे. सातारा- २०.८८, जावळी- ४६.६०, पाटण- ११.००, कऱ्हाड- १४.२३, कोरेगाव- १८.८०, खटाव- २६.५९, माण- २३.२९, फलटण-२३.४४, खंडाळा- ३०.२५, वाई-३०.१४, महाबळेश्र्वर- ३५.१३.