वऱ्हाडात काही ठिकाणी अवकाळी पाऊस

अकोला : वऱ्हाडात मंगळवारी (ता.२०) सकाळ पर्यंतच्या २४ तासांत ठिकठिकाणी अवकाळी पाऊस झाला. वीज पडून बुलडाणा जिल्ह्यात एका महिलेचा मृत्यू झाला तर दुसऱ्या घटनेत तीन जनावरे दगावली. अकोला जिल्हयात बार्शीटाकळी तालुक्यात प्रामुख्याने महान परिसरात वादळी वाऱ्यासह जोरदार पावसाने तुरीचे पीक जमिनीवर आडवे झाले.

अनेक भागात सोमवारी (ता.१९) दुपारी सुरु झालेला पाऊस रात्री उशिरापर्यंत सुरु होता. रात्री थोडी उसंत घेतल्यानंतर मंगळवारी (ता.२०) पुन्हा पहाटेपासून पाऊस सुरु झाला. सकाळी अाठ वाजेपर्यंत अकोला, वाशीम जिल्ह्यात बऱ्याच ठिकाणी पावसाची रिमझिम सुरु होती. काही ठिकाणी पावसाच्या सरींमध्ये जोरही होता. 

सोमवारी कामासाठी शेतात गेलेल्या माेताळा तालुक्यातील माळेगाव येथील दीपाली विजय भंगाळे (वय ३५) या महिलेचा वीज पडून मृत्यू झाला. सायंकाळी साडे पाच वाजेच्या सुमारास ही घटना घडली. शेतातील काम अाटोपून त्या घराकडे परतत येत असताना ही दुर्घटना घडली. खामगाव तालुक्यातील लोखंडा येथे वीज पडून तीन जनावरे ठार झाली. बार्शीटाकळी तालुक्यात वादळी वाऱ्यासह पाऊस झाल्याने तुरीचे पीक जमीनदोस्त झाले. कांदा, भाजीपाला पिकांचेही नुकसान झाले.   

मंगळवारी सकाळपर्यंत बुलडाणा मंडळात ३५, देऊळघाट मंडळात ३२, शेगाव मंडळात ३६, माटरगाव मंडळात २६, जलंब मंडळ २९ मिलीमीटर पावसाची नोंद झाली. अकोला जिल्ह्यात बार्शीटाकळी तालुक्यात सर्वाधिक २० मिलीमीटर पाऊस झाला. चिखली तालुक्यात २३, शेगावमध्ये १९, बुलडाण्यात १८.७, नांदुरा येथे ११.८ मिलीमीटर पाऊस झाला.  हा पाऊस हरभरा, कोरडवाहू कापूस या पिकांसाठी दिलासा देणारा ठरला अाहे.

सोमठाणा परिसरात दोन तास मेघगर्जनेसह पाऊस वाशीम : जिल्ह्यातील सोमठाणा परिसरात मंगळवारी (ता.२०) सकाळी सहा वाजेपासून अाठ वाजेपर्यंत जोरदार पाऊस झाला. सोमठाणा परीसरात मागील तीन दिवसांपासून ढगाळ वातावरण होते. यामुळे शेतकरी चिंतेत होते. ढगाळ वातावरणामुळे तूर, हरभरा या पिकांवर किडींचा प्रादुर्भाव दिसू लागला होता. हा पाऊस झाल्याने आता तूर, हरभरा, गहू या पिकांना थोडा फायदा होणार अाहे.