जळगावमध्ये लसीअभावी लाळ्या खुरकूतचा वाढला प्रादुर्भाव

जिल्हा परिषदेच्या पशुवैद्यकीय दवाखान्यात जनावरांच्यावर लाळ्या खुरकूत नियंत्रणासाठी योग्य उपचार होत नाही. खासगी पशुवैद्यक उपचार वाढून जास्त रक्कम घेत आहेत. शासनाने याची वेळेवर दखल घ्यावी. - - पशुपालक, ममुराबाद, जि. जळगाव
लाळ खूरकूत
लाळ खूरकूत
जळगाव ः लाळ्या खुरकूत प्रतिबंधक लस न दिल्याने जिल्ह्यातील जनावरांमध्ये याचा प्रादुर्भाव वाढू लागला आहे. यामुळे पशुपालकांना अधिक पैसे मोजून खासगी पशुवैद्यकाकडून उपचार करून घ्यावे लागत आहेत. एका जनावरांच्या उपचारासाठी किमान एक हजार ते १२०० रुपये खर्च येत असल्याने पशुपालकांना आर्थिक झळ सहन करावी लागत आहे. 
 
जिल्ह्यात पाचोरा, चाळीसगाव, जळगाव, जामनेर भागांत दुधाळ गाई, म्हशींची संख्या अधिक आहे. त्यामुळे मोठ्या प्रमाणात दुग्ध उत्पादन होते. सध्याच्या काळात जिल्हा सहकारी दूध संघासह इतर खासगी डेअऱ्यांच्या दूध संकलनात वाढ झाली होती. परंतु मागील आठ ते दहा दिवसांपासून दुधाळ जनावरांमध्ये लाळ्या खुरकूत आजाराचे प्रमाण वाढल्याने दुग्धोत्पादनावर परिणाम दिसू लागला आहे.  अजूनपर्यंत कुठल्याही गावामध्ये जनावरांना लाळ्या खुरकूत प्रतिबंधक लस दिलेली नाही. कारण जिल्हा परिषदेच्या पशुवैद्यकीय दवाखान्यांमध्ये ही लस उपलब्ध नव्हती.
 
जे सधन पशुपालक आहेत, त्यांनी खासगी पशुवैद्यकांकडून जनावरांचे लसीकरण करून घेतले. त्यांच्या जनावरांमध्ये या आजाराचा फारसा प्रसार झालेला नाही. परंतु एखादी बैलजोडी व घरच्या दुधापुरती गाय, म्हैस सांभाळणाऱ्या शेतकऱ्यांकडील जनावरांना मोठ्या प्रमाणात लाळ्या खुरकूताचा प्रादुर्भाव झालेला आहे. सध्याच्या काळात जनावरांना योग्य उपचार मिळण्याची गरज आहे, परंतु शेतकऱ्यांच्या भाबडेपणाचा फायदा घेऊन लाळ्या खुरकूतग्रस्त जनावरांना खासगी पशुवैद्यक दोन ते तीन सलाईन, काही इंजेक्‍शने देत आहे. योग्य उपचाराअभावी एका जनावरामागे एक ते दोन दिवसांत एक हजार ते बाराशे रुपये खर्च होत आहे. 
 
जिल्हा परिषदेचे तीन ते चार गावे मिळून एक पशुवैद्यकीय उपचार केंद्र किंवा दवाखाना आहे. परंतु तेथे पुरेसे मनुष्यबळ नाही, कर्मचारी उपस्थित नसतात. तसेच लाळ्या खुरकूत प्रतिबंधक उपचार यंत्रणा नसल्याच्या तक्रारी शेतकऱ्यांनी केलेली आहे. याबाबत जिल्हा परिषदेचे पशुसंवर्धन अधिकारी डॉ. पी. एस. इंगळे यांच्याशी मोबाईलवर संपर्क साधला, परंतु त्यांनी प्रतिसाद दिला नाही. 

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com