हिंगोली जिल्ह्यात फळबागांचे वाळून सरपण

हिंगोली : जिल्ह्यातील औंढा तालुक्यातील अनेक गाव-शिवारातील फळबागा पाण्याअभावी जागेवरच वाळून गेल्या आहेत. फळबागांचे सरपण झाले आहे. त्यामुळे या भागातील शेतकऱ्यांचे लाखो रुपयांचे नुकसान झाले आहे. नुकसानीचे पंचनामे करून आर्थिक मदत देण्याची मागणी शेतकऱ्यांकडून केली जात आहे. गतवर्षीच्या पावसाळ्यात औंढा तालुक्यात कमी पाऊस झाला. खरिपाच्या पेरणीनंतर दीर्घ खंड पडल्यामुळे सोयाबीन, मूग, उडीद आदी पिके जागेवरच होरपळून गेली होती. खरिपातून काहीच हाती लागले नव्हते. कमी पावसामुळे केळी येथील लघू तलाव तसेच सिद्धेश्वर धरणदेखील भरले नाही. पूर्णा नदीचा प्रवाह खंडित झाल्यामुळे पात्र अनेक दिवसांपासून कोरडे पडले आहे. त्यामुळे शेतकऱ्यांच्या विहिरी, बोअरची पाणीपातळी खालावत गेली. रब्बी पिकांसह उन्हाळी हंगामातील पिके पाण्याअभावी सकून गेली होती. त्यामुळे शेतकऱ्यांना मोठा आर्थिक फटका बसला होता. गेल्या महिनाभरापासून दिवसेंदिवस तापमानात होत असलेली वाढ तसेच भूगर्भातील पाण्याचा उपसा यामुळे सिंचनासह पिण्यासाठी पाणी कमी पडू लागले. औंढा नागनाथ तालुक्यातील केळी, येळी, हिवरखेडा, साळना, गोजेगाव, अनखळी पोटा, वाडी, उंडेगाव आदी गाव शिवारातील संत्रा, मोसंबी आदी गावांतील शेतकरी विविध फळबागांच्या माध्यमातून उत्पादन घेत आहेत. परंतु यंदा फळबागा आजवर कशाबशा तग धरून होत्या. परंतु वाढलेले ऊन आणि पाण्याची कमी उपलब्धता यामुळे अनेक गावांतील फळबागा जागेवरच वाळून जात आहेत. शेतकरी वाळलेली झाडे उपटून टाकत रान खरीप पेरणीसाठी मोकळे करत आहेत. फळबागा वाळल्यामुळे झालेल्या नुकसानीचे पंचनामे करून शेतकऱ्यांना आर्थिक मदत देण्यात यावी, अशी मागणी या भागातील शेतकऱ्यांनी केली आहे. आजवर फळबागेतून चांगले उत्पन्न मिळाले. यंदा अडीच एकर पैकी एकर संत्राबाग पाणी कमी पडल्यामुळे जागेवरच वाळून गेली. उर्वरित बाग जिवंत राहण्याची खात्री नाही. नुकसानीचे पंचनामे करून मदत द्यावी. - दिलीप दराडे,  शेतकरी, अनखळी वाडी, जि. हिंगोली.