नियमित कर्ज भरणाऱ्या शेतकऱ्यांचा अकोला जिल्हा बँकेकडून सन्मान

अकोला  ः नियमित कर्जाची परतफेड करणाऱ्या शेतकऱ्यांचा अकोला जिल्हा मध्यवर्ती सहकारी बँकेकडून अनोखा सन्मान केला जात अाहे. सेवा सहकारी सोसायटीचे अधिकारी, बँकेचे निरीक्षक हे गावोगावी सभा घेऊन नियमित कर्ज फेडणाऱ्या शेतकऱ्यांचा गौरव करीत अाहेत.

गेल्या काही वर्षांत पीककर्जाचा विषय बँकांसाठी महत्त्वाचा झालेला अाहे. नियमितपणे कर्ज भरणाऱ्या शेतकऱ्यांना पाठबळ देण्यासाठी बँकेने खास पाऊल उचलले अाहे. अकोला जिल्हा मध्यवर्ती जिल्हा बँकेने अकोला व वाशीम जिल्ह्यात नियमित सभासद शेतकऱ्यांचा खास सन्मान करणे सुरू केले. या वर्षी ३१ मार्च २०१८ अखेर पीककर्ज भरणा केलेल्यांचा प्रत्यक्ष गावात सभा घेऊन गौरव केला जात अाहे.

अकोट तालुक्यातील तरोडा सेवा सहकारी सोसायटी व जिल्हा बँकेच्या चोहोट्टा शाखेच्या वतीने तरोडा गावात शुक्रवारी (ता. २१) मेळावा घेण्यात अाला. या वेळी सेवा सोसायटीचे सचिव विनोद हिंगणकर, बँक निरीक्षक सुरेश एस. गावंडे, सतीश तराळे, चेतन भांडे उपस्थित होते. तरोडा गावातील बहुतांश सभासद नियमित कर्जदार असून, ते घेतलेल्या कर्जाचा वेळेत भरणा करतात. अशा सभासदांचा बँकेने या माध्यमातून सन्मान करण्याचे ठरविले अाहे.