सारंगखेडा (जि. नंदुरबार) - दररोज पंधरा लिटर दूध, खुराक म्हणून काजू, बदाम, किसमिस, खारीक व इतर बरेच काही. दिमतीला दोन सेवक... हे वर्णन कोणा पहिलवानाचे नाही, तर सारंगखेडा येथील एकमुखी दत्त यात्रेतील अश्‍व बाजारातील सौंदर्यवती "पद्‌मा'चे आहे. गेल्या वर्षी येथे झालेल्या अश्‍व सौंदर्य स्पर्धेत पहिल्या आलेल्या या अश्‍वाची किंमत दोन कोटी रुपयांपर्यंत लावली आहे. यंदा होणाऱ्या अश्‍व सौंदर्य स्पर्धेतही "पद्‌मा'चा सहभाग राहणार आहे. येथील अश्‍व बाजार महिनाभर सुरू राहणार असल्याने तरबेज, उमदे अश्‍व दाखल होत आहेत. आतापर्यंत अश्‍व बाजारात 2200 अश्‍व दाखल झाले आहेत. त्यापैकी साडेसातशे अश्‍वांची विक्री झाली असून, त्यात अडीच कोटींची उलाढाल झाली आहे. काल (ता. 14) "पद्‌मा'नामक पांढरी घोडी येथील बाजारात दाखल झाली. तिचे वाजत-गाजत स्वागत करण्यात आले. पांढऱ्या रंगालाही लाजवेल इतकी शुभ्र असलेल्या या अश्‍वाने आपल्या अदांनी अनेक अश्‍वप्रेमींना घायाळ केले आहे. काठेवाडी जातीची ही "पद्‌मा' चार वर्षांची असून, इंदूर (मध्य प्रदेश) येथील बालकृष्ण चंदेल यांच्या मालकीची आहे. तिची किंमत दोन कोटी रुपये लावली आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.