जत तालुक्यात वादळी वारे, गारपिटीने फळबागांचे नुकसान

सांगली : जत तालुक्यातील वाषाण, रामपूर, येळदरी, शेगाव, घाटगेवाडी आणि बागेवाडी येथे गुरुवारी (ता. २५) सायंकाळी वादळी वारे आणि गारपिटीमुळे द्राक्ष, केळी आणि पपई बागा आणि हळद पिकाचे नुकसान झाले आहे. महसूल विभागाने या भागातील नुकसानीचे पंचनामे करण्याचे आदेश तलाठ्यांना दिले आहेत. जत शहर व परिसरात दिवसभर ढगाळ वातावरण होते. सायंकाळी चार वाजण्याच्या दरम्यान तालुक्याच्या दक्षिण भागात विजांचा कडकडाट सुरू झाला. परंतु पाऊस पडला नाही. त्यादरम्यान बागेवाडी (ता. जत) येथे सायंकाळी पाच वाजण्याच्या दरम्यान वादळी वाऱ्यामुळे भगवान पडोळकर, सुखदेव आडगळे, शिवाजी वाघमारे यांच्या घरांवरील पत्रे व कौले उडून नुकसान झाले आहे. या परिसरात काही ठिकाणी वादळी वाऱ्याने झाडे उन्मळून पडली. नुकसानीचा व्हिडिअो... जतपासून सुमारे पाच किलोमीटर अंतरावर असलेल्या घाटगेवाडी व रामपूर गावाच्या उत्तर बाजूला सुमारे तीन चौरस किलोमीटर परिसरात सायंकाळी अचानक गारपीट झाली. घाटगेवाडी येथे वादळी वारा, गारपिटीच्या पावसाने पपई बागेचे साडेसात लाख रुपयांचे नुकसान झाले आहे. दुपारी चार ते पाचच्या सुमारास वादळी वाऱ्यासह गारांचा पाऊस झाला. वादळी पाऊस व गारा पडल्याने पपई बागेला आलेल्या फूलकळीचे नुकसान झाले आहे. त्यांच्या बागेचे पाच लाख रुपयांचे नुकसान झाले आहे, तर कुलकर्णी यांच्या शेताशेजारील शशिकांत भोसले यांच्या एक एकर पपई बागेचेही अडीच लाखाचे नुकसान झाले आहे. शुक्रवारी (ता. २६) सकाळी या तिन्ही गावात उपविभागीय कृषी अधिकारी के. बी. खोत यांनी भेट दिली आहे. पंचनामा करण्यासाठी सहा टीम करण्यात आली आहे. या टीममध्ये तलाठी, ग्रामसेवक, कृषी सहायक यांचा समावेश आहे. सकाळपासून पंचनामे करण्यास संबधित विभागाचे अधिकारी यांनी सुरवात केली आहे. उपविभागीय कृषी अधिकारी के. बी. खोत याबाबत म्हणाले, रामपूर गावातील द्राक्ष, हळद, केळी, पपई या पिकांचे नुकसान झाले आहे. वाशाण, रामपूर, येळदरी या गावात सुमारे ६० टक्क्यांहून अधिक नुकसान झाले आहे. रामपूर गावात चार, वाशाण आणि येळदारी गावात अनुक्रमे एक टीम झालेल्या पिकाची पाहणी करून पंचनामे करणार आहेत. पंचनामे झाल्याशिवाय किती क्षेत्र बाधित झाले आहे आणि किती आर्थिक नुकसान झाले आहे याची माहिती सायंकाळी हाती येईल.