मुंबई : कृषी क्षेत्रातील मनुष्यबळाला विशेष कौशल्य प्रशिक्षण देऊन त्यांना सेवा क्षेत्रातील संधी उपलब्ध करून देण्यावर भर देण्यात येणार असल्याचे मुख्यमंत्री देवेंद्र फडणवीस यांनी सांगितले. ''मॅग्नेटिक महाराष्ट्र कन्व्हर्जन्स २०१८'' या जागतिक गुंतवणूक परिषदेत आयोजित "जर्नी टू ट्रिलियन डॉलर इकॉनॉमी" या विषयावर आयोजित परिसंवादात ते बोलत होते.
या परिसंवादामध्ये निती आयोगाचे अध्यक्ष अमिताभ कांत यांसह विविध उद्योजकांनी सहभाग घेतला. देशाची वाटचाल पाच ट्रिलियन डॉलर क्लबकडे होत असताना, राज्याने २०२५ पर्यंत एक ट्रिलियन डॉलर अर्थव्यवस्थेकडे पोचण्याची महत्त्वाकांक्षा राज्याने बाळगली आहे. हे लक्ष्य साध्य करण्यासाठीचा रोडमॅप तयार केला असून, मुख्यमंत्र्यांनी याबाबतचे सादरीकरण केले.
मुख्यमंत्री म्हणाले, की देशांतर्गत होणाऱ्या सकल घरेलू उत्पादनात कृषी क्षेत्राचा वाटा हा केवळ ११ टक्के इतका आहे, मात्र या क्षेत्रात वापरले जाणारे मनुष्यबळ हे सुमारे ५० टक्के आहे. तर उत्पादन क्षेत्रातील उत्पन्न ३० टक्के आणि वापरले जाणारे मनुष्यबळ हे २० टक्के आहे. तर सेवा क्षेत्रातील उत्पन्नाचा दर हा ५९ टक्के आहे; मात्र यात वापरले जाणारे मनुष्यबळ हे केवळ ३० टक्के एवढे आहे. कृषी क्षेत्रातील औद्योगिक वाढ ही ५ टक्के आहे, उत्पादन क्षेत्रातील व सेवा क्षेत्रातील वाढ ही १५ टक्के आहे.
२०२५ पर्यंत सेवा क्षेत्रातील वाढ ही ६७ टक्क्यांपर्यंत वाढणार आहे. सेवा क्षेत्रात होणाऱ्या वृद्धीचा वाढता दर लक्षात घेता या क्षेत्राला आवश्यक असणारे कौशल्य कृषी क्षेत्रातील मनुष्यबळाला उपलब्ध करून दिल्यास राज्याला ५ मिलियन कुशल मनुष्यबळ उपलब्ध होणार आहे.
राज्यात १२ लाख कोटींची गुंतवणूक मॅग्नेटिक महाराष्ट्र कन्व्हर्जन्स २०१८ या गुंतवणुकदारांच्या परिषदेत सोमवारी मुख्यमंत्री देवेंद्र फडणवीस यांच्या उपस्थितीत विविध ४३ सामंजस्य करारावर स्वाक्षऱ्या करण्यात आल्या. या करारामुळे महाराष्ट्रात १२ लाख कोटींची गुंतवणूक होणार आहे. तसेच मोठ्या प्रमाणात रोजगार निर्मिती होईल. या सामंजस्य करारात देश-विदेशांतील नामांकित उद्योग समूहांचा समावेश आहे. यावेळी मुख्यमंत्री देवेंद्र फडणवीस यांनी अमेरिकेचे भारतातील राजदूत केनेथ जस्ट व रशियाचे भारतातील राजदूत निकोलाय झिलस्तोव्ह यांच्या विविध क्षेत्रांतील गुंतवणूक, कौशल्य विकास व रोजगार निर्मितीबाबत चर्चा केली.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.