केंद्राच्या योजनांची अंमलबजावणी करा : जाधव

बुलडाणा : केंद्र शासनाकडून अनेक कल्याणकारी योजना राबविल्या जातात. या योजनांच्या माध्यमातून समाजातील वंचित घटक, आर्थिक दुर्बल घटक मुख्य प्रवाहात येतील. त्यामुळे त्यांचा विकास साधला जावू शकतो. त्यासाठी केंद्र पुरस्कृत सर्व योजनांची प्रभावीपणे अंमलबजावणी करावी, अशा सूचना खासदार प्रतापराव जाधव यांनी दिल्या. जिल्हा विकास समन्वय व सनियंत्रण समिती (दिशा)च्या बैठकीत ते बोलत होते. जिल्हा परिषद मुख्य कार्यकारी अधिकारी षण्मुखराजन, अतिरिक्त जिल्हाधिकारी प्रमोदसिंह दुबे, उपमुख्यकार्यकारी अधिकारी राजेश लोखंडे आदी उपस्थित होते.

दुष्काळी परिस्थिती असल्यामुळे पाणी टंचाईचे संकट तीव्र होत आहे. अशा परिस्थितीत यंत्रणांनी टंचाईग्रस्‍त गावांमध्ये पाणीपुरवठा करण्यासाठी काम करावे. राष्ट्रीय पेयजल योजनेतंर्गतची कामे प्राधान्याने पूर्ण करावी. गरचेच्या ठिकाणी त्वरित टँकर सुरू करावे. प्रधानमंत्री आवास योजनेअंतर्गत लाभार्थ्यांच्या प्रतीक्षा याद्यांवरील घरकुल देण्याची कार्यवाही तातडीने राबवावी. भूमी अभिलेख विभागाने रस्ते व सिंचन प्रकल्पांमध्ये जमिनी गेलेल्या शेतकऱ्यांच्या गट क्रमांक, ७/१२ दुरूस्ती तातडीने करव्यात. प्रकल्पांत जमिनी गेलेल्या शेतकऱ्यांच्या गट क्रमांक दुरुस्ती, ७/१२ दुरुस्ती, जमिन नोंदणी विषयक तक्रारी असतात. त्यांचा निपटारा करून शेतकऱ्यांना दिलासा द्यावा, अशा सूचना जाधव यांनी दिल्या.

बैठकीत राष्ट्रीय पेयजल, स्वच्छ भारत अभियान, राष्ट्रीय ग्रामीण आरोग्य अभियान, एकात्मिक बाल विकास योजना, दीनदयाल उपाध्याय ग्रामीण ज्योती योजना, एकात्मिक बाल विकास योजना, शालेय पोषण आहार कार्यक्रम, उज्ज्वला योजना, दीनदयाल अंत्योदय योजना, दीनदयाल उपाध्याय ग्रामीण कौशल्य योजना आदी योजनांचा आढावा घेण्यात आला.