जळगाव बाजारात केळी दरात सुधारणा

जळगाव बाजारात केळी दरात सुधारणा
जळगाव बाजारात केळी दरात सुधारणा

जळगाव ः जिल्ह्यात मुक्ताईनगर व रावेरात दर्जेदार नवती केळीच्या आवकेत वाढ झाली आहे. उठाव बऱ्यापैकी असल्याने दरात मागील आठवड्यात क्विंटलमागे ८१ रुपयांनी वाढ झाली आहे. दर प्रतिक्विंटल १०८१ रुपये प्रतिक्विंटलपर्यंत पोचले आहेत. रावेर, यावल, मुक्ताईनगर व जामनेरात मिळून प्रतिदिन २०० ट्रक (एक ट्रक १५ मेट्रिक टन क्षमता) केळीची आवक सुरू आहे.  

मध्य प्रदेशातील बऱ्हाणपूर येथील बाजारातही केळीच्या लिलावांना प्रतिसाद मिळत असून, तेथे मागील दोन-तीन दिवस जाहीर लिलावात केळीला प्रतिक्विंटल १३११ रुपयांपर्यंतचे कमाल तर किमान ८०० रुपयांपर्यंतचे दर मिळाले. बऱ्हाणपूर भागातील नाचणखेडा, बहादरपूर, लोणी भागातही नवती केळीची काढणी सध्या वेगात सुरू आहे. तेथून बॉक्‍समध्ये पॅकिंग करून केळीची पाठवणूक उत्तर भारतात केली जात आहे. दिल्ली येथील व्यापारी बऱ्हाणपुरातून अधिकची केळी मागवून घेत आहेत. कारण, मागील १०-१२ दिवसांपासून दिल्ली येथील बाजारपेठेत आंध्र प्रदेश व नजीकच्या भागातून होणारा केळीचा पुरवठा कमी झाला आहे. 

आंध्र प्रदेशातील केळी कमाल ८०० रुपये प्रतिक्विंटल दरात दिल्लीच्या बाजारपेठेत उपलब्ध होत होती. परंतु, तेथील केळीची काढणी जवळपास आटोपल्याने दिल्ली येथील व्यापाऱ्यांनी केळीसाठी बऱ्हाणपूर, रावेर, मुक्ताईनगर भागांत धाव घेतली आहे. बऱ्हाणपूर येथील बाजारात मागील पाच-सहा दिवसांपासून २१० ट्रक केळीची आवक होत आहे. आवकेत तेथेही वाढ झाली आहे. परंतु, उठाव असल्याने दरात तेथेही सुधारणा झाली आहे. पंजाब, काश्‍मिरातील काही मोठ्या खरेदीदारांनी बऱ्हाणपूर व रावेरातील एजंटच्या माध्यमातून थेट रेफर व्हॅनमधून केळीचा पुरवठा करून घेण्यासही सुरवात केली आहे. 

चोपडा, जळगाव, पाचोरा भागांत आवक कमी आहे. कारण, कांदेबाग केळीची काढणी जवळपास आटोपली आहे. नवती केळी जळगाव, चोपड्यात अपवादानेच आहे. जामनेरातून पाठवणूक ठाणे, कल्याण, पुणे भागांत होत असल्याची माहिती मिळाली. पिलबाग केळी रावेर, मुक्ताईनगर व यावल भागांत उपलब्ध होत असून, या केळीसही ९०० रुपये प्रतिक्विंटलचे दर मिळाले. 

मका, बाजरीचे दर २१०० पर्यंत खानदेशातील दोंडाईचा, शिरपूर (जि. धुळे), शहादा (जि. नंदुरबार), जळगाव जिल्ह्यातील जळगाव, पाचोरा, अमळनेर, मुक्ताईनगर येथील बाजारात मक्‍याची आवक अजूनही वाढलेली नाही. पाचोरा, अमळनेर, चोपडा व जळगाव बाजार समितीत मिळून प्रतिदिन ५०० क्विंटलपर्यंतच आवक होत असून, दर २१०० रुपये आहेत.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com