भाजीपाला गुणवत्ता केंद्राचे बारामतीत गुरुवारी उद्‌घाटन

बारामती, जि. पुणे : येथील अॅग्रिकल्चरल डेव्हलपमेंट ट्रस्टच्या कृषी विज्ञान केंद्रात इंडो-डच प्रकल्पांतर्गत उभारण्यात आलेल्या सेंटर ऑफ एक्सलन्स या उच्च भाजीपाला गुणवत्ता केंद्राचे गुरुवारी (ता. २) उद्घाटन होणार आहे. भारतीय भाजीपाला उत्पादकांसाठी नवी दिशा देणारे हे भारतातील पहिलेच केंद्र आहे.  या संदर्भात आयोजित पत्रकार परीषदेत अॅग्रिकल्चरल डेव्हलपमेंट ट्रस्टचे प्रमुख राजेंद्र पवार व कृषी विज्ञान केंद्राचे प्रमुख डॉ. सय्यद शाकीरअली यांनी माहिती दिली. या वेळी शारदानगर कृषी महाविद्यालयाचे प्राचार्य नीलेश नलावडे, प्रशांत तनपुरे, यशवंत जगदाळे, संतोष गोडसे आदी उपस्थित होते. येत्या २ नोव्हेंबर रोजी भाजीपाला गुणवत्ता केंद्राचे उद्घाटन नेदरलँडचे कृषिमंत्री अल्ड्रिक खियरवेल्ड यांच्या हस्ते व माजी केंद्रीय कृषिमंत्री शरद पवार यांच्या अध्यक्षतेखाली होणार आहे. कार्यक्रमास महाराष्ट्राचे कृषिमंत्री पांडुरंग फुंडकर, पालकमंत्री गिरीश बापट, कृषी राज्यमंत्री सदाभाऊ खोत, माजी उपमुख्यमंत्री अजित पवार, खासदार सुप्रिया सुळे, नेदरलँडचे कृषी सल्लागार वाउटर व्हेरे आदी उपस्थित राहणार आहेत. गुरुवारी सकाळी दहा वाजता याचे उद्घाटन होणार असून, याचा औपचारिक सोहळा शारदानगरमधील अप्पासाहेब पवार सभागृहात होणार आहे.  या संदर्भात श्री. पवार व डॉ. सय्यद म्हणाले, ‘‘आपल्याकडे भाजीपाल्याचे उत्पादन प्रतिचौरस मीटरमध्ये टोमॅटो २० किलो, ढोबळी मिरची, काकडी १०-१२ किलोच्या आसपास आहे. तेच उत्पादन तेवढ्याच क्षेत्रफळात दुपटीने, तिपटीने घेण्यासाठी व कमी कालावधीत जास्त उत्पादन व जास्त उत्पन्न मिळवून देण्यासाठी नेदरलँडसारख्या देशाकडून तंत्रज्ञान घेण्याचा सामंजस्य करार २०१२ मध्ये झाला. या प्रकल्पाचे भूमिपूजन पंतप्रधान नरेंद्र मोदी यांच्या हस्ते २०१५ मध्ये झाले. हा प्रकल्प आता पूर्ण झाला असून, राज्यातीलच नव्हे, तर देशातील भाजीपाला उत्पादकांसाठी तो आता सेवेत सज्ज होणार आहे. शेतकऱ्यांना एकाच ठिकाणी भाजीपाल्याच्या विविध जाती नेमक्या कशा वाढतात, त्यांचे उत्पादन कसे मिळते, हे प्रत्यक्ष अनुभवण्यासाठी हा प्रकल्प महत्त्वचा ठरणार आहे.