शेतमाल वाहतुकीच्या दरात वाढ

शेतमाल वाहतुकीच्या दरात वाढ
शेतमाल वाहतुकीच्या दरात वाढ

जळगाव : इंधनाचे दर दिवसागणिक वाढत आहेत. डिझेलचे दर मागील दोन वर्षांत लिटरमागे पाच रुपयांनी वाढून ७३ रुपयांवर गेले आहेत. परिणामी ग्रामीण भागातून शहरापर्यंत शेतमाल वाहतुकीचे दर गोणी किंवा पोत्यामागे १ रुपयाने वाढले आहेत. मळणी किंवा शेतीच्या मशागतीसंबंधी ट्रॅक्‍टर चालक, मालकांनी मात्र दरवाढ केलेली नाही. कारण दुष्काळी स्थिती आहे. 

जळगाव जिल्ह्यात केळीची शेती असली तरी ती सहा - सात तालुक्‍यांपुरती मर्यादीत आहे. उर्वरित आठ-नऊ तालुक्‍यांमध्ये बागायती क्षेत्र कमी, कापसाची शेती अधिक आहे. जिल्ह्यात पावसाचा मोठा खंड ऑगस्ट व आता सप्टेंबरमध्ये पडला आहे. पिकांची स्थिती नाजूक आहे. या सगळ्या स्थितीत ट्रॅक्‍टरने रोटाव्हेटर, नांगरणीचे दर स्थिर आहेत. 

नांगरणीसाठी एकरी १२०० रुपये दर आहे. हाच दर मागील वर्षीही होता. तर रोटाव्हेटरसाठी काही तालुक्‍यांमध्ये एकरी ९०० तर रावेर, यावल भागात १००० रुपये दर आहे. हे दरही मागील वर्षाएवढेच आहेत. त्यात दरवाढ झालेली नाही. सध्या मूग, उडदाखालील क्षेत्रात रोटाव्हेटरची कामे काही भागात सुरू आहेत. ती जुन्याच दरांमध्ये संबंधित ट्रॅक्‍टरमालक, चालक करीत आहेत. 

सध्या उडदाची मळणी अनेक ठिकाणी सुरू आहे. अनेक शेतकरी बैलजोडीच्या साह्याने मळणी करून घेतात. काही शेतकरी मनुष्यबळाच्या आधाराने मळणी करून घेतात. मोठे शेतकरी मळणी ट्रॅक्‍टर चलित यंत्राने मळणी करून घेत असून, त्याचे दरही स्थिर आहेत. उडदाची मळणी एक क्विंटलसाठी २०० रुपये या दरात केली जात आहे. तर सोयाबीनच्या मळणीसाठीही २०० ते २१० रुपये प्रतिक्विंटलचे दर आहेत. या दरांमध्येही फारशी वाढ झालेली नाही. कारण उडदाचे हवे तसे उत्पादन आलेले नाही. 

शेतमाल शेतातून किंवा गावातून वाहतुकीसाठीचे दर मालवाहू चालकांनी किरकोळ स्वरुपात वाढविले आहेत. धान्य वाहतुकीसंबंधी १२ किलोमीटरसाठी ५० रुपये प्रतिपोते (९० ते ९५ किलोचे पोते) असे दर आहेत. दर शहरातून गावात रासायनिक खतांच्या वाहतुकीसाठी १० किलोमीटरसाठी प्रतिगोणी (४५ ते ५० किलोची एक गोणी) २० रुपये दर आहेत. एका गोणीमागे एक रुपये अधिक दर घेतले जात आहेत.

आमच्या भागात मळणी, ट्रॅक्‍टरने मशागतीसंबंधीचे दर गेल्या उन्हाळ्यातच किरकोळ स्वरुपात वाढले होते. आता इंधन दरवाढ सुरूच असली तरी पाऊस नसल्याने मशागत, मळणीचे दर ट्रॅक्टर चालक, मालक यांनी वाढविलेले नाहीत.  - प्रवीण सपकाळे, शेतकरी, कानळदा, जि. जळगाव

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com