इंडिया ग्रेप हार्वेस्ट वाइन फेस्टिव्हलला सुरवात

लखमापूर, जि. नाशिक  : इंडिया ग्रेप हारवेस्ट व वाइन फेस्टिव्हलला दिंडोरी तालुक्यातील मोहाडी येथील सह्याद्री फार्म येथे शुक्रवारी (ता. ९) मोठ्या दिमाखात सुरवात झाली. सदर महोत्सवानिमित्त ११ मार्चपर्यंत जिल्ह्यातील विविध ठिकाणी शुक्रवार, शनिवार आणि रविवारी विविध कार्यक्रमांचे आयोजन करण्यात आले आहे.

इंडिया ग्रेप हारवेस्ट वाइन फेस्टिव्हलचे उद्घाटन आमदार देवयानी फरांदे, आमदार अनिल कदम, माजी आमदार माणिकराव कोकाटे, ‘सह्याद्री’चे विलासराव शिंदे, पर्यटन विकास महामंडळाचे सहव्यवस्थापकीय संचालक आशुतोष राठोड, द्राक्ष बागाईतदार संघाचे अध्यक्ष माणिकराव पाटील, कैलास भोसले, मानद सचिव रवींद्र बोराडे, जगन खापरे, विभागीय कृषी सहसंचालक दिलीप झेंडे माजी जि.प. गटनेते प्रवीण जाधव यांच्या हस्ते दीपप्रज्वलन करून झाले. प्रास्तविक इंडियन ग्रेप फेस्टिव्हलचे आयोजक जगदीश होळकर यांनी केले.

या वेळी बोलताना माजी आमदार माणिकराव कोकाटे यांनी शेतीमालाचे विपणन थेट ग्राहकांपर्यंत होणे गरजेचे असून, ‘सह्याद्री’ने शेतकऱ्यांना एकत्र आणत चालविलेले प्रयत्न कौतुकास्पद असून, जगदीश होळकर यांनीही वाइन उद्योगासाठी सातत्याने प्रयत्न करत असून, दोघांनीही आपले वाईन व कृषिमालाचे थेट ग्राहकांपर्यंत पोचविण्यासाठी शहरात आउटलेट सुरू करावे, असे आवाहन केले.

वेगवेगळ्या शेतीमालाची व्हावी इंडस्ट्री जगभरात द्राक्षामुळे नाशिकची नवी ओळख निर्माण झाली असून, ग्रेप फेस्टच्या निमित्ताने जिल्ह्याच्या व्यापार, पर्यटन यास चालना मिळणार असून, जिल्ह्यातील शेतकरी सर्वच शेतीमाल उत्पादनात अग्रेसर आहे. सह्याद्रीने शेतकऱ्यांना एकत्रित करत त्यांच्या शेतीमालाला अधिक भाव मिळवून देण्याचा प्रयत्न केला असून, जशी साखर उद्योग ही इंडस्ट्री झाली, तसेच प्रत्येक शेतीमालासाठी इंडस्ट्री उभी करण्याची गरज असल्याचे सह्याद्रीचे विलास शिंदे यांनी सांगितले.