नाशिकला २७ पासून ‘इंडिया पोल्ट्री एक्‍स्पो’

नाशिक : कुक्कुटपालनातील आधुनिक तंत्रज्ञानाची सर्वव्यापी माहिती देणारे तीनदिवसीय ‘इंडिया पोल्ट्री एक्‍स्पो’ नाशिक येथील ठक्कर डोम येथे शनिवार (ता. २७) ते सोमवार (ता. २९)दरम्यान होणार आहे.  शनिवारी (ता. २७) सकाळी १० वाजता राज्याचे पशुसंवर्धनमंत्री महादेव जानकर यांच्या हस्ते उद्‍घाटन होईल. या वेळी राज्याचे जलसंपदामंत्री तसेच नाशिक जिल्ह्याचे पालकमंत्री गिरीश महाजन, नाशिकचे खासदार हेमंत गोडसे, आमदार बाळासाहेब थोरात, देवयानी फरांदे, सीमा हिरे, राहुल आहेर, नाशिक जिल्हा परिषदेच्या अध्यक्षा शीतल सांगळे, नाशिकच्या महापौर रंजना भानसी, वेंकटेश्‍वरा हॅचरीजचे महाव्यवस्थापक डॉ. पी. जी. पेडगावकर, पोल्ट्री ब्रीडर्स वेल्फेअर असोसिएशनचे अध्यक्ष वसंतकुमार उपस्थित राहणार आहे.  या प्रदर्शनात राज्य शासन व पोल्ट्री व्यावसायिक यांच्या वतीने कुक्कुटपालन व्यवसायातील संधींबरोबरच पक्ष्यांचे रोग, आजार, पोषण तसेच आरोग्याच्या दृष्टीने महत्त्व आदी विषयांवर तज्ज्ञांकडून मार्गदर्शन होणार आहे. कुक्कुटपालन उद्योगासंबंधित सर्व उपकरणे, तंत्रज्ञान, साहित्य याची प्रात्यक्षिके या प्रदर्शनात असतील. विविध तंत्रज्ञानाची ५० हून अधिक स्टॉल्स असतील. राज्यासह गुजरात, मध्य प्रदेश, छत्तीसगड, आंध्र प्रदेश, कर्नाटक या राज्यांतील उद्योजक यात सहभागी होणार आहेत. शेतकरी व पोल्ट्री व्यावसायिकांनी या प्रदर्शनाचा लाभ घ्यावा, असे आवाहन पीपल फॉर पोल्ट्री यांच्यातर्फे करण्यात आले आहे.