भारत-सिंगापूर आर्थिक संबंध दृढ करणार

भारत-सिंगापूर आर्थिक संबंध दृढ करणार
भारत-सिंगापूर आर्थिक संबंध दृढ करणार

सिंगापूर : द्वीपक्षीय आर्थिक संबंध अधिक दृढ करण्याबाबत आणि संरक्षण संबंध वाढविण्याबाबत भारत आणि सिंगापूर यांच्यात एकमत झाले आहे. या दोन देशांमध्ये आज विविध आठ करारही करण्यात आले. सिंगापूर दौऱ्यावर आलेले पंतप्रधान नरेंद्र मोदी आणि सिंगापूरचे पंतप्रधान ली सेन लुंग यांच्यात शुक्रवार (ता. १) विविध मुद्यांवर चर्चा झाली. भारत-प्रशांत महासागर भागात व्यापारासाठी शांतता आणि मैत्रीपूर्ण वातावरण निर्माण होण्याची गरज या वेळी व्यक्त करण्यात आली. अत्यंत कठिण परिस्थितीतही भारत आणि सिंगापूरमधील संबंध टिकून राहिल्याचे मोदी यांनी या चर्चेनंतर झालेल्या संयुक्त पत्रकार परिषदेत सांगितले. दोन देशांमधील सर्वसमावेशक आर्थिक सहकार्य कराराचा दुसऱ्यांदा यशस्वीरित्या आढावा घेतला असला तरी या करारात लवकरच सुधारणा केली जाईल, असे मोदी म्हणाले. सध्या सायबर सुरक्षा आणि दहशतवाद वाढत असल्याने या क्षेत्रातही सहकार्याची आवश्‍यकता असल्याचे मोदी म्हणाले. विविध प्रकल्पांसाठी भारतातील राज्ये सिंगापूरमधील कंपन्यांचे सहकार्य घेत असल्याबद्दल ली सेन लुंग यांनी आनंद व्यक्त केला. आंध्र प्रदेशची राजधानी अमरावती सिंगापूरमधील कंपनीच्या मदतीने साकारली जात आहे, तर पुण्यातील विमानतळाचा विकास करण्यासाठीही महाराष्ट्र-सिंगापूर संयुक्त समितीची स्थापना करण्यात आली आहे, असे त्यांनी सांगितले.

सिंगापूर दौऱ्यातील ठळक घटना  सिंगापूरमधील प्रसिद्ध नानयांग तंत्रज्ञान विद्यापीठाला (एनटीयू) नरेंद्र मोदींनी भेट देत विद्यार्थ्यांशी संवाद साधला. जीवनाच्या प्रत्येक क्षेत्रामध्ये नवीन संकल्पनांची गरज असल्याचे मोदी या वेळी म्हणाले. या वेळी भारतातील काही विद्यापीठे, संस्था आणि "एनटीयू' दरम्यान सहा करार करण्यात आले.  सिंगापूरचे माजी राजनैतिक अधिकारी टॉमी कोह यांना जाहीर झालेला पद्मश्री पुरस्कार पंतप्रधान मोदींनी त्यांना दिला. यंदाच्या पुरस्कारप्राप्त दहा "आसियान'मधील व्यक्तींपैकी कोह हे एक आहेत. कोह हे अमेरिका आणि संयुक्त राष्ट्र संघात सिंगापूरचे राजदूत होते. चीन, जपान आणि भारताबरोबरील धोरणात्मक चर्चा सुरू होण्यातही त्यांचा मोठा वाटा होता.  भारत आणि सिंगापूरमध्ये "फायनान्शिअल टेक्‍नॉलॉजी'संबंधी संयुक्त कृती गट स्थापन करण्याबाबत दोन्ही देशांत एकमत झाले. डिजिटल इंडिया आणि देशभरात "आधार'ची यशस्वी अंमलबजावणी यामुळे भारत ही सिंगापूरमधील "फायनान्शिअल टेक्‍नॉलॉजी' क्षेत्रातील कंपन्यांसाठी मोठी बाजारपेठ असल्याचे ली सेन लुंग म्हणाले.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com