रामटेक परिसरात धानावर कीडरोगाचा प्रादुर्भाव

नागपूर : धानावर कीडरोगाचा प्रादुर्भाव वाढीस लागल्याने या भागातील नुकसानीची पाहणी करून मदत देण्यात यावी, अशी मागणी शेतकऱ्यांनी रामटेकचे उपविभागीय अधिकारी राम जोशी व तहसीलदार धर्मेश फुसाते यांच्याकडे निवेदनातून केली आहे. शेतकरी नेते संजय सत्येकार यांच्या नेतृत्वात हे निवेदन देण्यात आले.

नागपूर जिल्ह्यातील रामटेक, मौदा, पारशिवणी या परिसरातील धानावर करपा, तुडतुडे या कीड व रोगांचा प्रादुर्भाव मोठ्या प्रमाणावर झाला आहे. पाण्याअभावी या भागात आधीच रोवणी कमी क्षेत्रावर झाली.

त्यातच आता कीडरोगांनी पिकावर हल्ला चढविल्याने लागवड केलेल्या शेतकऱ्यांची उत्पादकतादेखील प्रभावित होणार आहे. त्याची दखल घेत शासनाने तत्काळ सर्वेक्षणाची परवानगी द्यावी व मदतीसाठी पुढाकार घ्यावा, अशी मागणी संजय सत्येकार, सनत दसरे, रामप्रसाद नागपूरे, शोभलाल मढाले, विकास उपराडे, संदीप दमाहे, शिवचरण दमाहे, उदाराम गराडे, रमेश दळने, शिवा नागपूरे, गोविंदा बसिने, फजील बसीने, दुर्गाप्रसाद नागपूरे यांनी निवेदनातून केली आहे.