नुकसानीचे पंचनामे होणार केव्हा?

नुकसानीचे पंचनामे होणार केव्हा?
नुकसानीचे पंचनामे होणार केव्हा?

जळगाव  ः खानदेशात सलग तिसऱ्या दिवशी म्हणजेच मंगळवारी (ता.१६) मध्यरात्रीदेखील पुर्वमोसमी वादळी पावसासह गारपीटही अनेक भागात झाली. साक्री, शिरपूर (जि.धुळे) भागात शेडनेट, पॉलिहाऊसचे मोठे नुकसान झाले. नुकसान सतत तीन दिवस झाले; परंतु कमी मनुष्यबळ व लोकसभा निवडणुकांची धामधूम यामुळे पंचनामेच सुरू झालेले नसल्याची माहिती आहे.   जिल्हा प्रशासन मात्र निवडणुकीच्या कामात व्यस्त आहे. कृषी, महसूल विभागाकडे पुरेसे मनुष्यबळ नाही. कर्मचारी जागेवर नसतात. तलाठी शेतकऱ्यांना मागील १७-१८ दिवसांपासून कार्यालयात भेटलेले नाहीत. यामुळे पंचनामेही ठप्प आहेत.  मंगळवारी सायंकाळी हिंगोणी (ता. शिरपूर) येथे एका घराला वीज स्पर्शून गेल्याने किरकोळ नुकसान झाले. दरम्यान, प्रल्हाद बाजीराव कोकणी (जुनी सांगवी, ता. शिरपूर) यांच्या शेतातील खळ्यात वीज कोसळून दोन बैल मृत्युमुखी पडले. साक्री तालुक्‍यातील खुडाणे व डोमकानीत गारपिटीसह अवकाळी पाऊस झाल्याने कांदा पिकासह चाऱ्याचे लाखो रुपयांचे नुकसान झाले. हातातोंडाशी आलेला घास हिरावला गेल्याने बळीराजा हतबल व हवालदिल झाला आहे. कांदा व गुरांसाठी राखून ठेवलेला चारा यांचे नुकसान झाल्याची माहिती शेतकरी पराग माळी यांनी दिली. पिंपळनेर भागातही पाऊस झाला. बेहेड ता. साक्री येथे एका शेडनेटचे वादळासह गारपीटीमुळे नुकसान झाले. सामोडे व धमनार (ता. साक्री) येथेही वीज पडून पाच पशुधन मृत्युमुखी पडले.   जळगाव जिल्ह्यात एरंडोल, धरणगाव, चोपडा, यावल भागातही मंगळवारी रात्री पावसाचा हलका शिडकावा झाला. सुसाट वाराही सुटला होता. सुमारे दोन ते तीन मिनिटे पाऊस काही भागांत झाला. नंदुरबार तालुक्‍यातील शनिमांडळ, न्याहली भागातही जोरदार पावसासह गारपीट झाली. डाळिंब बागा, शेडनेटला फटका बसला आहे.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com