पोकराअंतर्गत ८४ गावांत आंतरपीक प्रात्यक्षिक

परभणी : नानाजी देशमुख कृषी संजीवनी प्रकल्पांतर्गत (पोकरा) जिल्ह्यातील ८४ गावांमध्ये कापूस- मूग, सोयाबीन-तूर अशी आंतरपीक प्रात्यक्षिके घेण्यात येणार आहेत. या गावांतील शेतकऱ्यांना शेतीशाळांच्या माध्यमातून पीक लागवड, कीड, रोग, खत व्यवस्थापन तंत्रज्ञान याबाबत मार्गदर्शन करण्यात येणार आहे.

पोकराअंतर्गत जिल्ह्यातील ३९ गाव समूहातील २७५ गावांची निवड करण्यात आली आहे. २०१८-१९ मध्ये ९ समूहातील ८४ गावांमध्ये हा प्रकल्प राबविण्यात येणार आहे. या अंतर्गत गंगाखेड तालुक्‍यातील १२ गावांमध्ये ग्रामकृषी संजीवनी समित्या स्थापन करण्यात आल्या आहेत. उर्वरित गावांमध्ये लवकरच या समित्या स्थापन करण्यात येणार आहेत. या समित्यांमार्फत गावातील कामांचे सूक्ष्म नियोजन करण्यात येणार आहे.

हवामान अनुकूल शेतीशाळा या बाबी अंतर्गत ८४ गावांमध्ये प्रत्येकी दोन या प्रमाणे १६८ शेतीशाळांचे नियोजन करण्यात आले आहे. आठवड्यातील ठराविक दिवशी प्रात्यक्षिक घेतलेल्या शेतकऱ्यांच्या शेतावर जाऊन लागवड, कीड, रोग, खत व्यवस्थापन तंत्रज्ञान आदीं बाबत माहिती दिली जाणार आहे. आंतरपीक प्रात्यक्षिकांसाठी सोयाबीनच्या एमएयूएस ७१, तुरीच्या बीडीएन ७११, मुगाच्या उत्कर्षा या वाणांचे बियाणे शेतकऱ्यांना देण्यात येणार आहे.४० आर क्षेत्राचे एक प्रात्यक्षिक असणार आहे, असे पोकराचे प्रकल्प सहायक एम. एस. लांबडे यांनी सांगितले.