‘जैन’कडून बेल्जियमच्या इनोव्हा फूड्स कंपनीचे अधिग्रहण

जळगाव : जैन इरिगेशनची उपकंपनी जैन फार्म फ्रेश फूड्‌सने जागतिक दर्जाच्या बेल्जियम येथील इनोव्हा फूड्‌ या कंपनीचे शंभर टक्के भागभांडवल खरेदी करून तिचे अधिग्रहण केले. इनोव्हा फूडच्या अधिग्रहणामुळे युरोपियन बाजारपेठांसह आशियाई देशांमध्ये जैन फार्म फ्रेश फूड्‌सच्या उत्पादनांची शृंखला पोचणार आहे. यामूळे गुणवत्तापूर्ण कांदा, लसूण निर्जलीकरण केलेल्या भाज्या आणि नुकताच सुरू झालेल्या मसाला व्यवसायाचा विस्तार वाढला आहे. जैन फार्म फ्रेश फूड्‌स लिमिटेड ही जगातील सर्वांत मोठी फळ आणि भाजीपाला प्रक्रिया करणारी कंपनी आहे. जैन फार्म फ्रेश फूड्‌सने बेल्जिमयच्या इनोव्हा फूड्‌स एन. व्ही. बेल्जियम आणि संलग्न कंपन्यांचे शंभर टक्के भागभांडवल खरेदी केले. इनोव्हा फूड ही कंपनी बेल्जियममधील निर्जलीकरण केलेल्या भाजीपाला, मसाले, मसाले अर्क आणि इतर अन्न घटकांची विक्री करणारी कंपनी आहे. इनोव्ह फूड्‌सने भारत, चीन, अमेरिका (यूएसए), युरोपीयन युनियन (इयू), मोरोक्को, इंडोनेशिया आणि उझबेकिस्तान या देशांत उत्तम गुणवत्ता, अजोड आणि दीर्घकालीन पुरवठा साखळी विकसित केली आहे. बेल्जियम येथील अँटवर्प येथे या कंपनीचे प्रमुख कार्यालय आहे. इनोव्हा फूडच्या अधिग्रहणामुळे जैन फार्म फ्रेश फूड्‌सचे युरोपियन युनियनमधील महत्त्वाच्या बाजारपेठेत व्हर्टिकल इंटिग्रेशन होईल. इनोव्हा फूड ही व्यवस्थापन केलेली नफ्यातील कंपनी आहे. इनोव्हा फूडचा सध्याचा व्यवस्थापन गट तसाच कायम राहून पुढील भविष्यातील वाढीसाठी प्रयत्न केले जातील.

विकसनशील व गतिशील कंपनीत गुंतवणूक करताना अतिशय आनंद होत आहे. मागील काही काळापासून जैन आणि इनोव्हा फूड्‌स यांचे घनिष्ठ संबध आहेत. जैन फार्म फ्रेश फूड्‌सच्या दृष्टीने हे अधिग्रहण महत्त्वाचे ठरणार आहे. - अनिल जैन, अध्यक्ष, जैन फार्म फ्रेश फूड्स लि. जळगाव

गेल्या पंधरा वर्षांपासून भारतातील जैन फार्म फ्रेश फूड्स लि. आमचा महत्त्वाचा पुरवठादार आहे. आता हे संबंध अधिक दृढ झाले आहेत. जैन फार्म फ्रेश फूड्‌सच्या निर्जलकीकरण केलेल्या भाज्या आणि मसाला व्यवसाय यामुळे इनोव्हा फूड्‌सला निष्ठावान ग्राहकांना सेवा देता येईल. - मिचेल ड्रायसेन्स, अध्यक्ष, इनोव्हा फूड्‌स एन. व्ही. बेल्जियम