जळगाव जिल्ह्यात पीक कर्ज वितरण संथगतीने

जळगाव जिल्ह्यात पीक कर्ज वितरण संथगतीने
जळगाव जिल्ह्यात पीक कर्ज वितरण संथगतीने

जळगाव : जिल्ह्यात खरीप पीक कर्ज वितरणासंबंधी राष्ट्रीयीकृत व इतर बॅंकांमध्ये धीम्या गतीने कार्यवाही सुरू असून, निर्देशित लक्ष्यांकाच्या ३० टक्केही कर्ज वितरण जिल्ह्यात झालेले नसल्याची माहिती आहे.  अग्रणी बॅंक व इतर सहकारी बॅंकांसोबत जिल्हाधिकारी यांनी पतपुरवठा आराखडा व खरीप पीक कर्ज याबाबत चर्चा केली होती. या वेळेस एकही शेतकरी कर्जाविना राहायला नको, कर्ज वितरण लवकर करावे, अशा सूचना दिल्या होत्या. परंतु या सूचनांनुसार कार्यवाही झालेली नाही. कारण जिल्ह्यात सर्व बॅंकांना मिळून सुमारे १८०० कोटी खरीप पीक कर्ज वितरण करायचे आहे. यातील ३० टक्के वितरणही झालेले नाही. मध्यंतरी राष्ट्रीयीकृत बॅंकांमध्ये रोकडटंचाई होती. सध्या कोणत्याही टंचाईची माहिती समोर आलेली नसली तरी कर्ज वितरण फारशा गतीने सुरू नाही. जिल्हा बॅंकेने आपले कर्ज दर मंजूर करून पीक कर्ज वितरणास वेळेत सुरवात केली. परंतु कर्जमाफीचा घोळ व इतर कामे यात नियमित कर्जदारांना कर्ज वितरणाच्या कामावर काहीसा परिणाम दिसून येत आहे, असे विविध कार्यकाही सहकारी सोसायट्यांच्या सचिवांचे म्हणणे आहे. जिल्हा बॅंक सोसायट्यांना पतपुरवठा करते. सोसायटीकडून शेतकऱ्याला कर्ज मिळते. कर्जासंबंधी शेतकऱ्यांनी आपले सातबारा उतारे सचिव यांच्याकडे दिले आहेत. सचिव मंडळीने फक्त नियमित कर्जदारांकडून सातबारा उतारे घेतले आहेत. यात काही नियमित कर्जदारांचे सातबारा उतारे अजूनही सचिवांनी पूर्णपणे गोळा केलेले नसल्याचे शेतकऱ्यांचे म्हणणे आहे.  मे महिन्यात नियमित कर्जदारांना कर्ज वितरण पूर्ण होईल, असे सांगितले जात होते. परंतु कर्ज वितरण अजूनही पूर्ण झालेले नाही. काही सोसायट्यांमध्ये तर एकाही शेतकऱ्याला कर्ज मिळालेले नाही. वित्तीय अडचणींमुळे शेतकऱ्यांच्या खरीप हंगामाच्या नियोजनावर परिणाम होत आहे. कारण शेतकऱ्यांना जमीन तयार करणे, बियाणे, मजुरी यासाठी निधीची गरज आहे. जिल्ह्यात कापूस उत्पादक अधिक आहेत. त्यांना बियाणे घ्यावे लागणार आहे. तसेच बागायतदार किंवा कृत्रीम जलसाठे उपलब्ध असलेल्या शेतकऱ्यांना ठिबक, ठिबकचे सबमेन पाइप यासाठी निधीची गरज असणार आहे. परंतु हातात पुरेसा पैसा नसल्याने शेतकऱ्यांचे नियोजन कोलमडत आहे. उधार, उसनवारीने शेतीची मशागत व इतर प्राथमिक कामे शेतकऱ्यांना करून घ्यावी लागत असल्याचे सांगितले जात आहे.  राष्ट्रीयीकृत व इतर बॅंकांकडून पीक कर्ज वितरण गतीने सुरू नाही. यामुळे कर्ज भरूनही शेतकरी पैशांच्या प्रतीक्षेत आहेत. सध्याच्या काळात शेतकऱ्यांकडे पुरेसे पैसे हवे असतात. परंतु शेतकऱ्यांच्या गरजा लक्षात घेऊन कोणीही काम करीत नसल्याचे चित्र आहे.  - रमेश पाटील, शेतकरी, रावेर

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com