जळगाव जिल्ह्यात कांदा रोपवाटिकेत वाढ

जळगाव : जळगाव जिल्ह्यात तापी व गिरणा काठावरील गावांमध्ये कांदा रोपवाटिका यंदा वाढत असून, शेतकरी ६०० ते ८०० रुपये प्रतिकिलो दराचे बियाणे आणून त्याची पेरणी वाफ्यांमध्ये करीत आहेत. प्रतिवाफा १२०० ते १५०० रुपये दरात विक्री होईल, असा विश्‍वास शेतकऱ्यांना आहे.

यंदा धुळे जिल्हा दुष्काळी स्थितीत असल्याने नुकसान झाले आहे. कांदा लागवड कमी होईल, अशी स्थिती आहे. कारण कूपनलिका किंवा विहिरींचे पाणी फक्‍त जानेवारीपर्यंतच पुरेल. कांद्याला मार्चअखेरपर्यंत पाणी लागेल. जळगाव जिल्ह्यातील गिरणा व तापी काठावरील गावांमध्ये कांदा लागवड वाढणार आहे. सध्या दर बऱ्यापैकी आहेत. अनेक शेतकरी रोपवाटिका तयार करीत आहेत. तीन बाय २० फुटांचे वाफे १२०० ते १५०० रुपयांना विकले जातील. रोपे विक्रीतूनच नफा मिळविण्याचे नियोजन शेतकऱ्यांनी केले आहे.

बी पेरल्यानंतर दीड महिन्यात रोप लागवडीसाठी तयार होते. कमी वेळेत आणि जागेत नफा कमविण्यासाठी शेतकऱ्यांनी रोपवाटिकांवर भर दिला आहे. तीन बाय २० ते २२ फुटांच्या १४ वाफ्यांमध्ये चार किलो बियाणे टाकत आहेत. रोपवाटिका जळगाव, चोपडा, धरणगाव, एरंडोल व पाचोरा तालुक्‍यात अधिक आहेत.

लागवड रावेर, यावल, चोपडा व जळगाव भागात वाढेल. कारण कांदा फक्त साडेतीन महिन्यांचे पीक असून, बेवडसाठीही उपयुक्त आहे. डिसेंबरमध्ये लागवड केल्यास मार्चअखेर क्षेत्र रिकामे होईल. लागलीच त्या क्षेत्रात कापसाची लागवड करता येईल. जमिनीचा पोतही सुधारेल. म्हणून कांदा लागवडीला शेतकरी पसंती देत आहेत, असे सांगण्यात आले.