जलयुक्त शिवार कामांच्या मंजुरीसाठी जूनपर्यंत मुदतवाढ : जलसंधारणमंत्री

पुणे : जलयुक्त शिवार अभियानासाठी २०१७-१८ मध्ये देण्यात आलेल्या निधीतून मार्चपूर्वी कामे पूर्ण करायची होती. मंजुरी अभावी शिल्लक राहिलेल्या निधीतून करण्यात येणाऱ्या कामांना मुदतवाढ दिली आहे. जूनअखेरपर्यंत या कामांना मंजुरी द्यावी, असे आदेश जिल्हा प्रशासनाला दिले आहेत, अशी माहिती राज्याचे मृदा व जलसंधारणमंत्री राम शिंदे यांनी दिली.  रविवारी (ता. १३) पत्रकार परिषदेत बोलताना मंत्री शिंदे म्हणाले, ‘‘जलयुक्त शिवार अभियानासाठी विशेष निधीची तरतूद केली आहे. अातापर्यंत १२ हजार गावे जलपरिपूर्ण झाली आहेत. ४ लाख २५ हजारांपेक्षा अधिक कामे मार्च महिन्यापूर्वी पूर्ण झाली आहेत. त्यात आणखी वाढ होणार आहे. २०१७-१८ ची कामे मार्च अखेरपर्यंत पूर्ण करण्याच्या सूचना होत्या. मात्र या कामांना मुदतवाढ देण्यात आली असून, जून अखेरपर्यंत ही कामे पूर्ण करावीत, अशा सूचना देण्यात आल्या आहेत.’’मुख्यमंत्री देवेंद्र फडणवीस यांनी सर्वांसाठी पाणीटंचाईमुक्त गावे करण्यासाठी २५ हजार गावांपर्यंत जलयुक्त शिवार अभियान नेण्याचे उद्दिष्ट ठेवले आहे. २०१८-१९ वर्षांसाठी १ हजार कोटी वितरीत केले आहेत. नवीन मंजुरी देऊन, कामे तत्काळ सुरू करण्याचे आदेश दिले आहेत. गतवर्षीच्या निधीतील कामे जून अखेरपर्यंत पूर्ण होतील तसेच चालू वर्षाच्या निधीतनूही बरीचशी कामे मार्गी लागतील, असेही शिंदे यांनी सांगितले.