खान्देशात गारपिटीने जामनेर तालुक्यात नुकसान

जळगाव : खानदेशात रविवारी (ता. ११) तापीकाठावरील काही गावांमध्ये एक ते दीड मिनीट हरभऱ्याच्या आकाराच्या गारपिटीसह पावसाचा शिडकावा झाला. कुठेही गारपिटीने मोठे नुकसान झाल्याचे वृत्त नाही. परंतु मळणीवरील हरभरा, दादर यांचे ढीग ताडपत्रीने झाकून ठेवावे लागले. तर कापणीवर आलेल्या केळीची तातडीने मिळेल त्या दरात कापणी करून घेण्याची वेळ केळी उत्पादकांवर आली.  रविवारी सकाळपासून ढगाळ वातावरण होते. तर दुपारी १२.४५ च्या सुमारास तापीकाठावरील चोपडा, जळगाव, अमळनेर, यावल आदी भागांत एक ते दीड मिनीट पावसाचा हलका शिडकावा झाला. सोबतच बारीक गाराही पडल्या. यामुळे केळीसह इतर पिकांचे मोठे नुकसान झाले नाही, परंतु शेतकऱ्यांची धावपळ उडाली. शेतात पडलेले दादरची कणसे, हरभरा यांचे ढीग लागलीच ताडपत्री व प्लॅस्टिकच्या पेपरने झाकून ठेवावे लागले. तसेच सिंचनाची कामेही काही ठिकाणी थांबविण्यात आली.  पाऊस आला किंवा गारपीट झाली तर मोठे नुकसान होईल, या भीतीने यावल, जळगाव, चोपडा भागात जुनारी व आगाप नवती केळी बागांमध्ये केळीची कापणी रविवारी दुपारनंतर सुरू झाली. तर सोमवारी सकाळीही कापणी हाती घेण्यात आल्याचे चित्र दिसून आले. जिल्ह्यात अमळनेर, चाळीसगाव, पाचोरा, पारोळा, मुक्ताईनगर, रावेर भागांतही अर्धा ते एक मिनिटच पाऊस झाला. काही भागांत ऊन सावल्यांचा खेळ सुरू होता. शेतकरी शेतातच कामे आवरत होते. 

जामनेरात नुकसान जामनेर तालुक्‍यातील फत्तेपूर, तोंडापूर, भारूडखेडा, वडाळी, मांडवे, वाकोद आदी भागांत बोरांच्या आकाराचा गारा पडला. तसेच पाऊसही अधिकचा झाला. १० ते १५ मिनिटे या भागात पाऊस झाला. तर गाराही एक ते दीड मिनीट पडल्या. त्यात गहू, कांदा, हरभरा व इतर फळ पिकांचे नुकसान झाल्याची माहिती मिळाली. सोमवारी (ता. १२)देखील ढगाळ व आर्द्रतायुक्त वातावरण कायम होते. जलसंपदामंत्री गिरीश महाजन यांनी नुकसानग्रस्त भागाची पाहणी केली.  सकाळी ऊन पडले होते. दुपारी ऊन-सावल्यांचा खेळ सुरू झाला. तर पूर्वेकडून पश्‍चिमेकडे वारे वाहत होते. धुळे जिल्ह्यातील शिरपूर भागातही तरडी बभळाज, थाळनेर भागात अर्धा मिनीट बारीक गारांचा पाऊस झाला. शिंदखेडा, साक्री, धुळे भागांत मात्र ढगाळ वातावरण होते. अशीच स्थिती नंदुरबार जिल्ह्यातही होती. तेथेही रविवारी गारांसह पावसामुळे मोठे नुकसान झालेले नसल्याची माहिती मिळाली.