जळगाव जिल्ह्यात ज्वारीच्या पेरणीला पसंती

जळगाव जिल्ह्यात ज्वारीच्या पेरणीला पसंती
जळगाव जिल्ह्यात ज्वारीच्या पेरणीला पसंती

जळगाव : जिल्ह्यात रब्बीतील ज्वारी पेरणीकडे शेतकऱ्यांचा कल असून, चाऱ्याची गरज आणि पाण्याच्या कमतरतेमुळे शेतकरी ज्वारीची पेरणी करीत आहेत. जिल्ह्यात तापीकाठासह कमी पाणी उपलब्ध असलेल्या भागात दादर व संकरित ज्वारी पेरणी सुरू आहे.

काही शेतकरी परभणी कृषी विद्यापीठाने विकसित केलेल्या ज्वारीच्या वाणांची मागणी करीत आहेत. त्यात परभणी ज्योती वाणाची मागणी अधिक आहे. हे वाण जळगाव, चोपडा येथील बाजारात उपलब्ध नसल्याची स्थिती आहे. यामुळे पारंपरिक दादरची पेरणी काही शेतकरी करीत आहेत. यंदा जेवढा हरभरा असेल, तेवढीच ज्वारी असेल, असा नवा अंदाज व्यक्त केला जात आहे. कारण हरभऱ्याला मागील वर्षी कवडीमोल दरात विकावे लागले. हरभऱ्याची काड, भुसा चारा म्हणून फारशी उपयोगात येत नाही. दुधाळ पशुधनासाठी ती वारंवार खाऊ घालणे शेतकरी अयोग्य मानतात. काबुली व इतर हरभऱ्यालाही दर नव्हते. शासकीय खरेदीची बोंबाबोंब झाल्याने अडचणी अधिक निर्माण झाल्या.

ज्वारीचे दरही बरे, चारा उपयुक्त ज्वारी कमी पाण्यावर येणारे पीक आहे. दादर केवळ हवेतील आर्द्रतेवर येते. तिला काळ्या कसदार जमिनीत सिंचनाचीदेखील गरज नसते. संकरित ज्वारी एक दोनदा चांगले पट पद्धतीने सिंचन केले, तर जोमात येते. चारा चांगला मिळतो. यंदा चारा पुरेसा नाही. मागील वर्षी दादरचा कडबा ३६०० रुपये शेकडा होता. यामुळे कडब्यातच बऱ्यापैकी पैसा शेतकऱ्यांना मिळाला. म्हणून शेतकरी यंदा ज्वारी पेरणी वाढवीत असल्याचे चित्र आहे. खानदेशात शहादा, शिंदखेडा, तळोदा, चोपडा, जळगाव, पाचोरा, भडगाव, चाळीसगाव भागांत ज्वारीची पेरणी यंदा वाढू शकते, असा अंदाज आहे. ही पेरणी जवळपास ७० ते ८० हजार हेक्‍टरपर्यंत जाऊ शकते, असेही कृषी विभागातील सूत्रांचे म्हणणे आहे.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com