बुलडाणा : जिल्ह्यातील महत्त्वाकांक्षी असलेल्या जिगाव प्रकल्पाच्या कामाची निविदा यवतमाळ येथील बाजोरिया कन्स्ट्रक्‍शन कंपनीला देण्यासाठी अधिकाऱ्यांनी पदाचा गैरप्रकार केल्याचे समोर आले आहे.
संबंधित बांधकाम कंपनी व स्वत:ला आर्थिक फायदा करून घेण्यासाठी जिगाव प्रकल्पाच्या निविदा प्रक्रियेत बनावट दस्तऐवज तयार करण्यात आले. यामुळे शासनाची मोठी फसवणूक झाली असून या प्रकरणाची खामगाव शहर पोलिस ठाण्यात तक्रार दाखल झाली. यात जिगाव प्राधिकरण, जलसंपदा व पाटबंधारे विभागातील अभियंता व अधिकाऱ्यांवर शनिवारी (ता. 4) रात्री गुन्हे दाखल करण्यात आले आहेत. लाचलुचपत प्रतिबंधक विभागाच्या चौकशीत हे बडे अधिकारी गळाला लागल्याने खळबळ उडाली आहे.
जिल्ह्यात नांदुरा तालुक्‍यात पूर्णा नदीवर जिगाव प्रकल्प तयार होत आहे. या प्रकल्पाच्या निविदा प्रक्रियेत संबंधित कंत्राटदाराशी संगनमत करून गैरप्रकार करीत शासनाची फसवणूक केल्याचा आरोप ठेवण्यात आला आहे. लाचलुचपत प्रतिबंधक विभागाचे बुलडाणा येथील पोलिस निरीक्षक सोपान भाईक यांनी केलेल्या चौकशीत संबंधित अधिकारी दोषी आढळल्याने त्यांच्या विरोधात तक्रार दाखल झाली.
या तक्रारीवरून यवतमाळ येथील बाजोरिया कन्स्ट्रक्‍शन कंपनीचे संचालक सुमित रमेशचंद्र बाजोरिया, महाराष्ट्र जीवन प्राधिकरण विभागाचे चंद्रपूरचे कार्यकारी अभियंता संजय वाघ, अमरावती जलसंपदा विभागाचे तत्कालीन मुख्य अभियंता एम. व्ही. पाटील, नागपूर येथील गोसे खुर्द सिंचन प्रकल्पाचे मुख्य अभियंता सो. रा. सूर्यवंशी, बुलडाणा पाटबंधारे विभागाचे अधीक्षक अभियंता शरद गावंडे, पाटबंधारे विभागाचे अधीक्षक अभियंता भा. सा. वावरे, मन प्रकल्पाचे कार्यकारी अभियंता आर. जी. मुंधडा, नाशिकच्या मध्यवर्ती सिंचन प्रकल्पाचे अधीक्षक अभियंता भीमाशंकर पुरी या अधिकाऱ्यांच्या विरोधात विविध कलमानुसार गुन्हे दाखल करण्यात आले आहेत.
बांधकाम कंपनीच्या मागील पाच वर्षांतील उलाढालीचा विचार न करता केवळच दोनच वर्षांची सरासरी विचारात घेऊन त्यावर 20 टक्के नियमबाह्य व बेकादा सूट देण्याचा प्रयत्न करण्यात आला. मुख्य अभियंत्याने बाजोरिया कन्स्ट्रक्‍शन कंपनीला निविदेसाठी पात्र ठरविले. त्याला पूर्व अर्हता तपासणी समितीनेही विरोध केला नाही. या प्रकरणात सात अभियंत्यांनी शासनाची फसवणूक करीत कंत्राटदाराला लाभ मिळवून देण्यासाठी मदत केल्याचा आरोप आहे. या प्रकरणी लाचलुचपत प्रतिबंधक विभागाच्या महासंचालकांकडे तक्रार करण्यात आली होती. त्यानुसार झालेल्या चौकशीत सात अभियंते दोषी आढळले आहेत.
जिगाव प्रकल्पाचे काम अत्यंत संथगतीने सुरू आहे. या कामात मोठ्या प्रमाणावर भ्रष्टाचार होत असल्याच्या तक्रारी होत्या. त्यानुसार लाचलुचपत प्रतिबंधक विभागाने चौकशी केली असता मोठे अधिकारी यात सहभागी असल्याचे समोर आले आहे. खामगाव, अमरावती, नाशिक व नागपूर येथील बड्या अधिकाऱ्यांवर पोलिसांनी गुन्हा दाखल केला असल्याने खळबळ उडाली आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.