जळगाव जिल्ह्यात ज्वारीची कापणी पुढील आठवड्यात

जळगाव : जिल्ह्यात बेवड म्हणून रावेर, यावल, चोपडा, पाचोरा भागात ज्वारीचे दाणे पक्व होत आहेत. पीक काळ्या कसदार जमिनीत पीक बऱ्यापैकी असून, पुढील आठवड्यात ज्वारीची कापणी होईल, असे संकेत आहेत.

जिल्ह्यात खरिपात तृणधान्यामध्ये सर्वाधिक ज्वारीची पेरणी केली जाते. जवळपास ७० हजार हेक्‍टवर पेरणी झाली होती. मध्यंतरी पावसाने ताण दिल्याने हलक्‍या, मुरमाड जमिनीत कणसे बारीक पडली. दाणे भरण्यास अडथळे आले. वाढही खुंटली होती. परंतु निसवणीच्या वेळेस भीजपाऊस झाला. यामुळे कणसे येऊन दाणे भरण्याची प्रक्रियाही सुरू झाली. मागील काही दिवसांपासून कोरडे वातावरण असल्याने काळ्या कसदार जमिनीत कणसे जोमात भरत आहेत. यंदा उत्पादन व चारा बऱ्यापैकी येईल, अशी स्थिती आहे. शेतकऱ्यांनी संकरित ज्वारीची अधिक पेरणी केली आहे. ज्वारीचे क्षेत्र रिकामे झाल्यानंतर त्यात रब्बी पिकांची पेरणी होईल.

ज्यांच्याकडे पाणी आहे, ते केळीची लागवड करतील. रावेर, चोपडा व यावल भागात केळी पिकासाठी बेवड म्हणून ज्वारीची पेरणी करण्याचा प्रघातच आहे. चाराही कसदार मिळत असल्याने अनेक शेतकरी मका, बाजरीऐवजी ज्वारीला पसंती देतात. दाण्यांचा दर्जाही शुभ्र, टपोरा आहे. त्यामुळे दर्जेदार उत्पादन येईल. दरही बऱ्यापैकी मिळतील, अशी अपेक्षा शेतकऱ्यांना आहे.