कळीतच कोमेजले ‘शेवंतीचे’ अागार

नगर ः नगर व पारनेर तालुक्‍यातील अनेक गावांत फुलशेती केली जाते. मात्र, यंदा दुष्काळाचा गंभीर फटका फुलशेतीला बसला आहे. अनेक शेतकऱ्यांनी पाणी नसल्याने शेवंतीचे प्लॉट सोडून दिले आहेत. त्यामुळे ‘कळी’ उमलण्याआधीच शेवतीचे आगार कोमेजले आहे. पाऊस नसल्याने पाण्याअभावी शेवंतीचे आगार म्हणून ओळख असलेल्या दोन्ही तालुक्‍यांतील शेती धोक्‍यात आली आहे.

गणेशोत्सव, नवरात्र, दसरा आणि दिवाळीत फुलांना विषेश मागणी असते. नगर व पारनेर या दोन तालुक्‍यांतील शेतकरी मोठ्या प्रमाणात फुलशेती पिकवतात. नगर तालुक्‍यातील कामरगाव, भोरवाडी, चास, भोयरेपठार, पिंपळगाव कौडा, अकोळनेर, जाधववाडी, हिवरेबाजार, पारनेर तालुक्‍यातील रायतळे, वाळवणे, सुपे, राळेगण सिद्धी, हंगे, ही शेवंतीच्या फुलशेतीची अागार आहेत.

यावर्षी फुलशेती करणाऱ्या शेतकऱ्यांनी बंगळूर, पुणे, थेऊर या भागातून चढ्या भावाने शेवंतीची रोपे आणून तर काहींनी पारंपरिक काशीची (मुळी) विक्रमी लागवड केली. मात्र, जुलै पासून पावसाने दडी मारल्याने या फुलशेतीला मोठा फटका बसून शेवंती फुलण्या आधीच कळीतच कोमेजून गेल्याने फुलशेती पिकवणाऱ्या शेतकऱ्यांना आर्थिक नुकसान सहन करावे लागले. राजा, रतलाम व पारंपरिक काशीची (मुळी ) लागवड फेब्रुवारीच्या मध्यावर केली जाते. याला एकरी ३५ ते ४० हजार रुपयांचा खर्च येतो. या पिकास ९ महिने लागतात. तर हायब्रिड (संकरित) या वाणाची लागवड मार्चमध्ये केली जाते.

या संकरित (पेपर व्हाइट) टी रोपे बंगळूर, पुणे, थेऊर या भागांतून प्रतिरोप तीन रुपये प्रमाणे विकत आणून लावली जातात. यासाठी एकरी सत्तर हजार रुपये खर्च येतो. पाच महिन्यांनंतर या रोपांना कळ्या व फुले येण्यास सुरवात होते. पावसाने दडी मारल्याने अनेक शेतकऱ्यांनी आशेपोटी टॅंकरचे पाणी घालून ही रोपे जगवली. मात्र, मालाची प्रत आणि अपेक्षित बाजारभाव मिळत नसल्याने व खर्च परवडत नसल्याने बहुतांश शेतकऱ्यांनी या शेवंती फुलांचे प्लॉट सोडू दिले आहेत.

दसरा, दिवाळीच्या सुमारास राज्यातील नागपूर दिल्ली, पुणे, ठाणे, मंबई, दिल्ली येथील फुलाचे व्यापारी आगदी बांधावर येऊन फुले खरेदी करायची. या वर्षी पाऊस नसल्याने फुलांचे व्यापारी या भागात फिरकलेच नाहीत. त्यामुळे येईल त्या भावात सध्या बाजारात फुले विकावी लागतात. - संदीप कातोरे, उत्पादक शेतकरी, कामरगाव, ता. नगर