कर्नाटक निवडणुकीचे बिगुल वाजले

नवी दिल्ली ः दक्षिण भारताचे महाद्वार असणाऱ्या कर्नाटकमधील बहुचर्चित विधानसभा निवडणुकीचा बिगुल मंगळवारी (ता. २७) वाजला. पंतप्रधान नरेंद्र मोदी आणि कॉँग्रेस अध्यक्ष राहुल गांधी यांनी प्रतिष्ठेच्या केलेल्या कर्नाटक विधानसभेच्या २२४ जागांसाठी येत्या १२ मे रोजी एकाच टप्प्यात मतदान होणार असून, १५ मे रोजी निकाल जाहीर होतील, अशी घोषणा निवडणूक आयोगाने आज केली.  सध्याच्या २२४ सदस्यीय कर्नाटक विधानसभेचा कार्यकाळ २८ मेला संपणार आहे. या निवडणुकीसाठी उमेदवारी अर्ज दाखल करण्याची अंतिम मुदत २४ एप्रिलपर्यंत आहे; तर उमेदवारी अर्ज मागे घेण्याची अंतिम मुदत २७ एप्रिलपर्यंत असल्याचे आयोगाकडून स्पष्ट करण्यात आले. निवडणुकीत इव्हीएम मशिन बरोबरच व्हीव्हीपॅटचा वापर करण्यात येणार असल्याची माहिती निवडणूक आयुक्त ओमप्रकाश यांनी पत्रकार परिषदेत दिली. कर्नाटकमधील एकूण लोकसंख्येपैकी ७२ टक्के जनता मतदार असून, राज्यात ५६ हजार मतदान केंद्रे आहेत. या निवडणुकीची अधिसूचना १७ एप्रिलला जाहीर होणार असून, १७ तारखेपासूनच अर्ज दाखल करण्यास सुरवात होणार आहे उतावळा ‘भाजप' गुडघ्याला बाशिंग आयोगाच्या अधिकृत घोषणेपूर्वीच सत्तारूढ भाजपच्या "आयटी सेल'चे प्रमुख अमित मालवीय यांनी मतदानाची तारीख जाहीर केल्याने एकच खळबळ उडाली. हा वाद वाढताच मालवीय यांनी ट्विट डिलीट करून याचे खापर इंग्रजी वृत्तवाहिन्यांवर फोडले. निवडणूक आयोगाने मालवीय यांच्यावर कठोर कारवाई करण्याचे संकेत देताच भाजप नेत्यांचे एक शिष्टमंडळ निवडणूक आयोगाच्या कार्यालयात गेले आणि त्यांनी येथे माफी मागितल्याचे समजते.