पुणे जिल्हा बॅंकेकडून ६४ टक्के पीककर्ज वाटप

पुणे : पुणे जिल्हा मध्यवर्ती सहकारी बॅंकेने एक एप्रिलपासून पीककर्ज वाटप सुरू केले आहे. साडेचार महिन्यांत या बॅंकेने पुणे जिल्ह्यातील एक लाख ४२ हजार ५९९ सभासद शेतकऱ्यांना एक हजार ९२ कोटी ८६ लाख ८० हजार रुपये म्हणजेच उद्दिष्टाच्या तुलनेत ६४ टक्के पीककर्ज वाटप केले. गेल्या वर्षीच्या तुलनेत यंदा १३० कोटी २६ लाख १७ हजार रुपयांनी पीककर्ज अधिक वाटप केल्याची माहिती बॅंकेच्या सूत्रांनी दिली.

शेतकऱ्यांना खरीप हंगामात निविष्ठा खरेदीसाठी अडचणी येऊ नये, म्हणून दरवर्षी बॅंकेकडून पीककर्ज वाटप केले जाते. पुणे जिल्हा मध्यवर्ती सहकारी बॅंकेच्या जिल्ह्यात सुमारे २७२ शाखा आहेत. दरवर्षी या शाखांमार्फत सभासद शेतकऱ्यांना खरीप आणि रब्बी हंगामात पीककर्ज वाटप केले जाते. चालू वर्षी बॅंकेचे सुमारे अडीच लाखांपर्यंत सभासद शेतकरी आहेत. त्यापैकी सुमारे दोन लाखांहून अधिक शेतकरी पीककर्ज घेतात.

यंदाही या बॅंकेने सभासद शेतकऱ्यांसाठी सुमारे १६९८ कोटी ४२ लाख ७६ हजार रुपयांचे पीककर्ज वितरणाचे उद्दिष्ट ठेवले होते. गेल्या वर्षी खरिपासाठी हेच उद्दिष्ट १५४७ कोटी ८४ लाख ५८ हजार रुपयांचे होते. त्यापैकी एक लाख ३७ हजार ६६३ सभासद शेतकऱ्यांना ९६२ कोटी ६० लाख ६९ हजार रुपये म्हणजेच ६२ टक्के पीककर्जाचे वाटप झाले होते.

बॅंकेकडून ऊस, टोमॅटो, कांदा, बटाटा, फळबाग, केळी, डाळिंब, आंबा, गुलाब, जरबेरा, कार्नेशन, ढोबळी मिरची, भात, ज्वारी, बाजरी, भूईमूग आदी पिकांसाठी कर्ज उपलब्ध करून दिले जाते. सभासद शेतकऱ्यांना तीन लाख रुपयांपर्यंत बिनव्याजी पीककर्ज उपलब्ध करून दिले. तीन लाख रुपयांच्या पुढे ११ टक्के व्याजदराने पीककर्ज उपलब्ध करून दिले जाते. हे पीककर्ज शेतकऱ्यांना क्षेत्राच्या प्रमाणात ठरवून दिलेल्या पिकानुसार जाते. त्यामुळे जिल्ह्यातील मोठ्या प्रमाणात शेतकरी पीककर्ज घेऊन पुन्हा परतफेड करतात.