खरीप पेरणी, कापूस लागवडीबाबत नगरमधील शेतकऱ्यांचा हात आखडता

नगर  ः जिल्ह्यातील अकोले तालुका वगळता अन्य तालुक्‍यांत चार दिवासांपासून पावसाने विश्रांती घेतली आहे. त्यामुळे पहिल्या दोन दिवसांत जोरात सुरू झालेली कापूस लागवड, पेरणीबाबत आता पुन्हा शेतकऱ्यांनी हात आखडते घेतले आहेत. पाऊस बंद झाल्याने बियाणे विक्रीवरही परिणाम झाला असून, विक्री मंदावली आहे.

पावसाळा सुरू झाला तरी गेले १५ दिवस पाऊस नव्हता. अनेक भागांत पूर्वमोसमी पाऊस झाला नाही. शिवाय चांगला पाऊस झाल्याशिवाय पेरणी, कापूस लागवडीची घाई करू नये, असे कृषी विभागाने आवाहन केले होते. तसेच कापसाची उन्हाळी लागवड होणार नाही, याचीही कृषी विभागाने काळजी घेतली. परिणामी यंदा कापसाची आधी लागवड झाली नाही.

पावसाळा सुरू झाल्यावरही १५ दिवस पाऊस झाला नाही. मात्र, मागील सप्ताहात दोन दिवस झालेल्या पावसाने आणि तयार झालेल्या वातावरणामुळे कापूस लागवड, पेरणी सुरू झाली होती. खते, बियाण्यांची विक्रीही बऱ्यापैकी सुरू झाली होती. मात्र, दोन दिवसांतच पाऊस बंद झाला. आता चार दिवसांपासून अकोले तालुक्‍याचा पश्‍चिम भाग वगळता अन्य ठिकाणी पाऊस झाला नाही. त्यामुळे कापूस लागवड, पेरणीबाबत शेतकऱ्यांनी हात आखडते घेतले आहेत.

गेल्या वर्षी व त्याआधीही अनेक वेळा सुरवातीच्या पावसावर कापूस लागवड व पेरणी केल्यानंतर पावसाने ओढ दिल्याने अनेकांना दुबार पेरणी करण्याची वेळ आली होती. आता पुन्हा पाच दिवस पावसांनी उघडीप दिल्याने शेतकरी चिंताक्रांत झाले आहेत. लागवड झालेले उगवेल, मात्र नंतर पाऊस आला नाही तर दुबार पेरणीची वेळ येण्याची भीती आता पुन्हा व्यक्त होऊ लागली आहे. जिल्ह्यातील अनेक शेतकऱ्यांनी लागवड, पेरणी थांबवली असल्याचे चित्र आहे.

बियाणे विक्री स्थिती (टक्के) - भात ४०, बाजरी १५, मका १०, तूर ४०, उडीद ३५, मूग ३०, सोयाबीन ६५, कापूस ५०.