त्र्यंबकेश्वरमधील खरिपाच्या पेरण्या धोक्‍यात

त्र्यंबकेश्वर, जि. नाशिक : त्र्यंबकेश्वर तालुक्‍यास मृग नक्षत्राने हुलकावणी दिल्याने शेतकऱ्यांनी केलेल्या खरिपाच्या पेरण्या धोक्‍यात आल्या आहेत. मागील आठवड्यात केवळ त्र्यंबकेश्वर शहरात बऱ्यापैकी पाऊस बरसला. त्या व्यतिरिक्त तालुक्‍यात तुरळक वगळता दमदार पाऊस झालेला नाही. तालुक्‍यातील धरणांतील जलसाठा आता तळाला गेला आहे.

तालुक्‍यात धरणांची संख्या लक्षणीय आहे. गौतमी बेझे, अंबोली, कोणे, वाघेरे, अंजनेरी आदी धरणांतील जलसाठा आता तळाला गेला आहे. मॉन्सून तोंडावर आल्याचे दिसत असताना अचानक घुमजाव झाले आहे.

उसनवारीद्वारे शेतकऱ्यांची बियाणे खरेदी बाजारात बियाणे घेण्यासाठी झुंबड उडाली आहे. त्यामुळे आहे त्या परिस्थितीत हंगाम साधण्यासाठी उधार उसनवारी करून शेतकरी बियाणे खरेदी करीत आहेत. या वर्षी बियाण्यांच्या किमती वाढलेल्या असून, त्यात जीएसटीची भर पडलेली आहे.

कृषी खात्याकडून शेतकऱ्यांकडे दुर्लक्ष खरीप हंगाम साधण्यासाठी बळिराजा सरसावला आहे. मात्र प्रशासकीय यंत्रणा त्याकडे लक्ष देत नसल्याचे दिसून येत आहे. तालुका कृषी खाते सोशल मीडियातून माहिती टाकत असून, प्रत्यक्ष मार्गदर्शनाबाबत हात झटकत आहे. त्यामुळे शेतकऱ्यांना मार्गदर्शन मिळणे कठीण झाले आहे. सरकारच्या योजना लाभार्थ्यांपर्यंत पोचत नाहीत. कृषी खाते असून नसल्यासारखे झाले आहे. त्यामुळे तालुक्‍यातील शेतकरी प्रचंड संतापले आहेत. पंचायत समिती, कृषी विभाग बंद करा, अशी शेतकऱ्यांची मागणी आहे. तालुक्‍यात असलेल्या बी-बियाणे औषधे आदी विक्रीवर या विभागाचे नियंत्रण नाही. त्यामुळे शेतकऱ्यांनी नाराजीही व्यक्त केली आहे.