शेतकऱ्यांच्या विकासासाठी हरियानात स्वतंत्र प्राधिकरण

चंदीगड, हरियाना  : राज्यातील शेतकऱ्यांच्या विकासासाठी मनोहरलाल खट्टर सरकारने स्वतंत्र ‘हरियाना शेतकरी कल्याण प्राधिकरणा’ची स्थापना करण्याचा निर्णय घेतला आहे. याबाबत बोलताना मुख्यमंत्री खट्टर म्हणाले, की शेतीला किफायतशीर करणे, कृषी उत्पादकता आणि शेतकरी उत्पन्न वाढविणे या मुख्य उद्देशांसह शेतकरी कुटुंब आणि भूमिहीन मजुरांच्या शारीरिक, आर्थिक आणि तणावतणाव व्यवस्थापनाचे कार्यही हे प्राधिकरण करणार आहे.  ‘आणखी एक सुधारणा’ या मुख्यमंत्री खट्टर यांच्या कार्यक्रमाअंतर्गत राज्यात आयोजित प्रगतशील शेतकरी संवाद उपक्रमात त्यांनी ही घोषणा केली. कृषी आणि शेतकरी कल्याण मंत्री ओ. पी. धानकर अाणि अन्न, सार्वजनिक वितरण आणि ग्राहक संरक्षण राज्यमंत्री करण देव कम्बोज या वेळी उपस्थित होते.   मुख्यमंत्री खट्टर म्हणाले, की शेतकऱ्यांच्या सद्यस्थितीबाबत राज्य सरकार संवेदनशील आहे. याकरिता स्थापन करण्यात येणारे प्राधिकरण राज्यातील शेतकरी कुटुंबांसमोरील आव्हानांची सोडवणूक करून त्यांच्या उत्पन्नात वाढ करण्यासाठी कार्यरत राहणार आहे. मुख्यमंत्री खट्टर यांनी राज्यात प्रत्येक महिन्यात एक सुधारणा करण्याचा निर्णय जाहीर केला आहे. यानुसार त्यांनी शेतकऱ्यांसाठी स्वतंत्र प्राधिकरण स्थापन करण्याचा निर्णय घेतला.  मुख्यमंत्री खट्टर म्हणाले, की कृषी प्रक्रिया उद्योगांना चालना देण्यासाठी केंद्र सरकारने अर्थसंकल्पात ११०० कोटी रुपयांची तरतूद केली आहे. देशभरात ४२ फूड पार्क उभारली जाणार आहे. हरियाणातील प्रगतशील शेतकऱ्यांनी इतर शेतकऱ्यांच्या विकासासाठी प्रयत्न करायला हवा. लवकरच राज्य सरकार ‘आणखी एक सुधारणा’ उपक्रमातून ‘शेतकरी कल्याण कार्य्रकमा’चे आयोजन करणार आहे. या अंतर्गत प्रगतशील शेतकऱ्यांना सन्मान केला जाईल.