चिपळूण ः दापोली येथील डॉ. बाळासाहेब सावंत कोकण कृषी विद्यापीठाने खरीप हंगामात दर्जेदार उत्पादन देणाऱ्या भेंडी पिकाची ‘कोकण भेंडी’ (DPLOK-११) ही संकरित जात विकसित केली आहे. या वर्षीपासून वाकवली (ता. दापोली) येथील मध्यवर्ती संशोधन केंद्रामध्ये कोकण भेंडी जातीचे बियाणे शेतकऱ्यांसाठी उपलब्ध करून देण्यात आले आहे. डॉ. बाळासाहेब सावंत कोकण कृषी विद्यापीठाने संशोधनाअंती शिफारस केलेली ‘कोकण भेंडी’ ही भेंडीची पहिलीच जात आहे. महात्मा फुले कृषी विद्यापीठात झालेल्या ‘ॲग्रेस्को’मध्ये कोकण भेंडी या जातीची शिफारस करण्यात आली. या बैठकीला विद्यापीठाचे कुलगुरू डॉ. संजय सावंत, कुलसचिव डॉ. प्रमोद सावंत, संशोधक संचालक डॉ. पराग हळदणकर, विस्तार संचालक डॉ. संजय भावे, शिक्षण संचालक डॉ. सतीष नारखेडे आदी उपस्थित होते. जातीच्या वैशिष्ट्याबाबत विद्यापीठाचे संशोधक संचालक डॉ. पराग हळदणकर म्हणाले, की या संकरित जातीची खरीप हंगामासाठी शिफारस करण्यात आली आहे. भेंडीचे रोप सरळ वाढते, उपशाखा फुटत नाहीत. मोझॅक रोगास प्रतिकारक जात आहे. तसेच हे वाण अतिपावसातही तग धरणारे आहे. वाकवली येथील मध्यवर्ती संशोधन केंद्रावर आठ वर्षे या जातीचे संशोधन सुरू होते. याचबरोबरीने कोकणात ठिकठिकाणी शेतकऱ्यांच्या शेतावर दोन वर्षे लागवड करून या जातीच्या उत्पादनविषयक चाचण्या घेण्यात आल्या. या जातीचे हेक्‍टरी १३५ क्विंटल उत्पादन मिळते. ः डॉ. प्रकाश सानप, ७७९८६७२०६३
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.