सोलापूर विद्यापीठ उभारणार कृषी पर्यटन केंद्र

सोलापूर  : सोलापूर विद्यापीठाच्या वतीने हिरज रोडवरील पाच एकर परिसरात कृषी पर्यटन केंद्र उभारण्यात येणार आहे. सध्या आराखडा बनविण्याचे काम सुरू असून, जानेवारी २०१९ पर्यंत हे कृषी पर्यटन केंद्र पर्यटकांसाठी खुले करण्यात येणार असल्याचे विद्यापीठाच्या वतीने सांगण्यात आले.

कुलगुरुपदाची धुरा हाती घेतल्यानंतर डॉ. मृणालिनी फडणवीस यांनी विद्यापीठाची गुणवत्ता सुधारणे आणि अधिकाधिक विद्यार्थ्यांना रोजगार मिळावा, या उद्देशाने विद्यापीठात व्यवसायाभिमुख अभ्यासक्रम सुरू करण्याचे नियोजन केले आहे.

भाषा अभ्यासक्रम, कौशल्यविकास अभ्यासक्रम, संशोधनावर आधारित अभ्यासक्रम सुरू करण्याच्या दृष्टीने सध्या प्रयत्नही सुरू आहेत. विद्यापीठातील विद्यार्थ्यांबरोबरच पर्यटकांना निसर्गरम्य वातावरणाचा आनंद घेता यावा, यासाठी कृषी पर्यटन केंद्र उभारले जात आहे. त्याचे पहिल्या टप्प्यातील काम पूर्ण झाले असून, पुढील १५ दिवसांत प्रत्यक्ष कामाला प्रारंभ होईल.

गाईड्‌सद्वारे पर्यटकांना कृषी पर्यटन केंद्रातील विविध प्रकारची माहिती देण्यात येणार आहे. राज्यातील अन्य विद्यापीठांच्या तुलनेत सोलापूर विद्यापीठाचा हा कृषी पर्यटन केंद्राचा नवा उपक्रम ठरणार आहे. याबाबत कुलसचिव डॉ. गणेश मंझा यांनीही सोलापूर विद्यापीठाच्या वतीने सुरू करण्यात येणाऱ्या कृषी पर्यटन केंद्रात विविध प्रकारची झाडे, पक्षी, स्वीमिंग टॅंक यासह सोलापूरच्या स्थानिक अनेक विषयांचा समावेश असेल, असे सांगितले.